Auðvelt hjá Englandi

England vann í dag 4-0 sigur á Slóvakíu í vináttulandsleik á Wembley-leikvanginum í Lundunúm í dag.

David Beckham kom inn á sem varamaður í hálfleik og lék þar með sinn 109. landsleik á ferlinum. Þar með bætti hann met Bobby Moore sem hafði leikið flesta landsleiki sem útileikmaður.

Steven Gerrard lagði upp fyrsta markið fyrir Emile Heskey strax á áttundu mínútu leiksins. Heskey meiddist skömmu síðar og þurfti að fara af velli.

Carlton Cole kom inn á fyrir hann en meiddist líka stuttu síðar og þurfti einnig að fara af velli.

Beckham lagði upp annað mark leiksins fyrir Wayne Rooney sem skoraði með skalla.

Frank Lampard skoraði svo þriðja markið og lagði það fjórða upp fyrir Rooney.

England mætir Úkraínu í undankeppni HM 2010 á miðvikudagskvöldið.