Full afköst nást árið 2008

Hellisheiðarvirkjun, ný jarðvarmavirkjun Orkuveitu Reykjavíkur, var formlega gangsett í gær. Geir H. Haarde forsætisráðherra, Guðlaugur Þór Þórðarson, stjórnarformaður Orkuveitu Reykjavíkur, Masafumir Wani frá Mitshubishi-verksmiðjunum og Guðmundur Þóroddsson forstjóri fluttu ávörp í tilefni dagsins að viðstöddu fjölmenni.

Framkvæmdir við Hellisheiðarvirkjun hafa gengið að óskum og tvær 45 megavatta aflvélar hafa verið keyrðar í tilraunaskyni undanfarnar vikur. 33 megavatta lágþrýstivél verður gangsett á næsta ári og fjórða og fimmta vélasamstæðan ári síðar. Framleiðsla á heitu vatni hefst árið 2009 og er virkjuninni ætlað að anna eftirspurn eftir heitu vatni til ársins 2025. Áætlað er að byggja rafstöð sem framleiðir 270–300 MWe af rafmagni og varmastöð sem afkastar allt að 400 MWth, með sama sniði og gufuaflsvirkjun fyrirtækisins á Nesjavöllum.

Skipulag stöðvarhússins er þannig úr garði gert að í miðbyggingu er allt sem er sameiginlegt fyrir allt orkuverið, en hver framleiðslueining verður í sjálfstæðum einingum út frá miðbyggingunni. Vélasalir rafmagnsframleiðslu ganga til suðurs frá miðbyggingunni en varmastöðin til norðurs.

Í tengslum við nýtingu jarðvarmans á Hengilssvæðinu hefur Orkuveita Reykjavíkur staðið fyrir umfangsmikilli göngu- og reiðstígagerð á svæðinu. Þá hefur svæðið verið merkt til glöggvunar fyrir ferðafólk og gefin út kort af því. Loks hefur verið auglýst samkeppni um gerð nýs útilistaverks við stöðvarhús Hellisheiðarvirkjunar.