Ánægður með afstöðu Grindavíkur vegna fyrningar kvóta

„Ég er mjög ánægður með að þeir skuli taka þessa afstöðu," segir Eiríkur Tómasson, útgerðarmaður í Grindavík, um bókun bæjarráðs Grindavíkurbæjar vegna hugmynda um fyrningu á veiðiheimildum.

Í yfirlýsingunni kemur fram að bæjaryfirvöld í Grindavík séu sammála um að fyrningarleiðin sé ekki ásættanleg fyrir byggðina og hafna því harðlega að hún verði farin núna. Bæjarbúar í Grindavík hafi alltaf verið sammála um að sjávarútvegur sé lífæðin og grundvallaratvinnugrein byggðarinnar. Grindvíkingar hafa oftar en einu sinni verið settir í óvissu vegna umræðu innan stjórnmálaflokka um breytingar á fiskveiðistjórnunarkerfinu. Mikilvægt er að skapa ró um sjávarútveg og fiskvinnslu þannig að horfa megi til lengri tíma.

Eiríkur segir að fyrirtæki hans hafi verið starfandi í sextíu ár en undanfarið hafi mikill kvóti verið keyptur. Og ég get ekki séð að það sé nokkuð réttlæti fólgið í því að taka af fólki sem hefur verið selt því samkvæmt lögum frá Alþingi," segir Eiríkur. Hann segir að fyrirtækið sé skuldsett vegna þess og sé ennþá skuldsettara eftir bankahrunið. „ Og við erum að berjast við að halda þessu í horfinu," segir Eiríkur. Hann segir að 5% veiðiheimildir fyrnist á ári muni fyrirtækið þurfa að leggja einum bát fyrsta árið og einum bát á tveggja ára fresti eftir það.

Þess má geta að Samfylkingin mynda meirihluta í bæjarstjórn og bæjarráði Grindavíkurbæjar með Framsóknarflokknum.