Geri mitt allra besta fyrir bresku þjóðina

Gordon Brown, nýr forsætisráðherra Bretlands, sagðist myndu gera sitt allra besta í starfi fyrir bresku þjóðina og boðaði breytingar á tröppum Downing-strætis 10 þangað sem hann mun flytjast. Þangað kom hann skömmu eftir að Blair-fjölskyldan hafði kvatt þessi híbýli sín til síðustu tíu ára.

Það gerði hún eftir að heimilisfaðirinn Tony Blair afhenti Elísabetu Bretlandsdrottningu afsagnarbréf sitt sem forsætisráðherra Bretlands. Fjölskyldan kom svo fram á tröppur húsins og kvaddi fjölmiðla en hennar bíður nú breytt líf eftir tíu ár í hringiðu stjórnmálanna í Bretlandi.

Inn í Downingstræti 10 flytur Gordon Brown og fjölskylda hans, eiginkonan Sarah Macauley og synirnir John og James Fraser sem eru fjögurra ára og nærri eins árs.

Brown og Macauley komu að Downing-stræti fyrir stundu og þar sagðist Brown hafa fengið umboð frá Bretadrottningu til myndunar ríkisstjórnar. „Ég mun fylgja einkunnarorðum mínum frá því á skólaárum mínum og gera mitt allra besta fyrir bresku þjóðina," sagði Brown fyrir utan forsætisráðherrabústaðinn.

Sagðist hann jafnframt myndu verða staðfastur og þrautseigur í baráttu sinni fyrir betra Bretlandi og að hann myndi hlusta og læra af samborgurum sínum. Brown hefur boðað breytingar með stjórn sinni og sagði að lokum:„Hefjum umbreytinguna."

Búist er við því að Tony Blair fari síðar í dag til kjördæmis síns í Sedgefield þar sem hann tilkynnir um að hann hætti sem þingmaður eftir 24 ár á breska þinginu. Þá bendir allt til þess að hann verði sérstakur erindreki Fjórveldanna svokölluðu í málefnum Ísraels og Palestínu en tilkynnt verður um það síðar í dag.