Blair verður sérstakur erindreki Miðausturlanda-kvartettsins

Tony Blair, fyrrverandi forsætisráðherra Bretlands, hefur verið tilnefndur sérstakur erindreki hins svokallaða Miðausturlandakvartetts sem vinnur að friði fyrir botni Miðjarðarhafs. Frá þessu greindi talsmaður hjá Sameinuðu þjóðunum í dag. Blair hefur jafnframt sagt af sér sem þingmaður á breska þinginu eftir 24 ár þar í starfi.

Miðausturlandakvartettinn mynda Sameinuðu þjóðirnar, Evrópusambandið, Bandaríkin og Rússland. Blair sagði í síðasta fyrirspurnartíma sínum á breska þinginu í dag að tveggja ríkja lausn fyrir Ísrael og Palestínu yrði að fá forgang umfram allt annað. Sitt hlutverk, þegar og ef hann fengi hlutverk erindreka, væri að ná sátt í alþjóðasamfélaginu um hvað skuli gera í málefnum Ísraels og Palestínu. Hann sagði þetta vera mögulegt en ef árangur ætti að nást þyrfti mikla einbeitingu og enn meiri vinnu.

Heimildir Sky-fréttastofunnar herma að Gordon Brown, sem í dag tók við forsætisráðherraembættinu af Blair, muni ekki bíða boðanna að skipta um utanríkisráðherra. Margaret Beckett, sem gegnir því embætti nú, verði látin taka pokann sinn eða færð til strax á morgun.