Guðjón var ánægður með jafnteflið á móti Swindon

Guðjón Þórðarson, stjóri Crewe Alexandra, var ánægður með að hafa fengið stig út úr útileik á móti Swindon í ensku C-deildinni í dag. Eftir leikinn er Crewe í 20. sæti deildarinnar og tveimur stigum fyrir ofan fallsæti.

„Vörnin okkar og markvörður eiga skilið hrós fyrir að halda markinu hreinu. Það hefði ekki verið gaman að fá á sig mark í lokin þegar Swindon var komið í stuð. Ég er ánægður með stigið," sagði Guðjón.

Gylfi Þór Sigurðsson lék allan leikinn og fékk gott tækifæri til að skora í báðum hálfleikjum. Crewe fékk fleiri færi til þess að skora í fyrri hálfleik en í þeim seinni var Swindon hættulegra.