Of fáir krabbameinslæknar

Krabbameinslæknum á Landspítalanum fer fækkandi á meðan krabbameinssjúklingum fjölgar. Framkvæmdastjóri lyflækningasviðs segir að þau hafi átt fullt í fangi með að hafa nægilega marga lækna til að sinna sjúklingum með illkynja sjúkdóma.

Sextán læknar starfa nú á Landspítalanum við að sinna sjúklingum með krabbamein og munu tveir þeirra hætta bráðlega. Á lyflækningasviði eru átta læknar með mismunandi stöðuhlutfall, einn þeirra hættir störfum í haust,  þrír læknar sinna geislameðferð krabbameina og einn þeirra fer á eftirlaun í lok ársins, þá starfa fimm læknar á blóðlækningasviði. Á síðastliðnum árum hafa tveir aðrir hætt og aðeins einn komið í staðinn.

„Við höfum átt fullt í fangi með að hafa nægilega marga lækna til að sinna sjúklingum með illkynja sjúkdóma," segir Vilhelmína Haraldsdóttir framkvæmdastjóri lyflækningasviðs.

Vilhelmína segir að tvo til þrjá lækna þurfi til viðbótar svo vel sé. Auglýst hafi verið eftir læknum án árangurs en auglýst verði aftur.  

„Það er mjög mikilvægt að við náum að endurnýja og fá nýja lækna til að starfa með okkur. Nú eru íslenskir læknar starfandi erlendis, þá helst í Bandaríkjunum og Svíþjóð, og við munum náttúrulega gera okkar besta til að fá þá heim, það er ekki alveg vitað hvort það muni takast en við höfum þó góðar vonir í vissum tilfellum."

Fjórföld aukning hefur orðið á þeim sem greinast árlega með krabbamein frá því skráning hófst árið 1956. Nú greinast árlega um fjórtánhundruð Íslendingar með krabbamein segir á vef Krabbameinsskráningar. Langflest krabbamein greinast í eldra fólki. Fimmtíu prósent þeirra karla sem greindust með krabbamein á árunum 2007 til 2011 voru sjötíu ára og eldri og ríflega fjörtíu prósent kvenna.

„Sjúklingum með krabbamein hefur fjölgað og það er í beinu sambandi við vaxandi meðalaldur þjóðarinnar. Síðan eru alltaf sífellt fleiri sem eru á lífi og þurfa eftirlit og eftirmeðferð eftir að hafa fengið krabbamein, það er auðvitað mjög gleðilegt og segir okkur að árangurinn hefur verið góður en að sama skapi eru verkefnin fleiri líka," segir Vilhelmína.

Vilhelmína segir ástandið ekki eiga að bitna á sjúklingunum. „Við reynum náttúrulega að gera okkar besta til þess að forgangsraða svo störf læknanna fari fyrst og fremst í það þar sem þeir nýtast best og reynum þá að byggja á öðrum starfsstéttum eða yngri læknum til að hjálpa þeim. En þetta er býsna erfitt verkefni því þetta eru krefjandi verkefni að sinna krabbameinssjúkum."