Svíar taka aftur upp herskyldu

Yfirvöld í Svíþjóð hafa ákveðið að taka aftur upp herskyldu. Hún var lögð niður árið 2010 en takmörkuð útgáfa hennar verður tekin aftur upp á næsta ári. Einstaklingar sem fæddir eru á árunum 1999 og 2000 munu á næstunni fá upplýsingar um ákvörðunina og hvað hún þýðir. Um er að ræða bæði konur og karla, en áður fyrr átti herskyldan eingöngu við karlmenn.

Þeir sem hafa áhuga á að ganga til liðs við herinn verður frjálst að gera það, en stefnan er að um fjögur þúsund konur og menn bætist við herinn á næsta ári. Þeir verða valdir úr um þrettán þúsund manna hópi.

Peter Hultqvist segir að ef her Svía eigi að vera klár í slaginn verði að fylla upp í sjálfboðaliðakerfið með takmarkaðri herskyldu. Skortur hefur verið á sjálfboðaliðum og Svíar hafa áhyggjur af auknum heræfingum og umsvifum Rússa við Eystrasaltshafið. Í samtali við SVT Nyheter, sænska ríkisútvarpið, segir hann að muni ástandið versna verði mögulegt að fleiri verði kallaðir til.

Marinetta Radebo, talskona varnarmálaráðuneytisins, segir BBC að nýliðarnir muni vera í hernum í níu til tólf mánuði. Markmiðið sé að hvetja þá til að verða atvinnuhermenn eða bjóða sig fram í þjóðvarðliðið.

Mikill meirihluti var um breytingarnar á sænska þinginu. TheLocal vísar einnig til rannsóknar frá því í fyrra sem sýndi fram á að nærri því þrír af hverjum fjórum voru sammála því að taka aftur upp herskylduna.