Fimmtungur íbúa í Húnaþingi vestra í sóttkví

Kjartan Kjartansson skrifar 18. mars 2020 21:04

Grunnskólinn á Hvammstanga þar sem starfsmaður greindist smitaður af kórónuveiru í gær. Já.is

Rúmlega 230 íbúar í Húnaþingi vestra eru nú í sóttkví eftir að fyrsta Covid-19-smitið greindist í sveitarfélaginu í gær. Um fimmtungur íbúa sveitarfélagsins er því í sóttkví og varar sveitarstjórinn við skertri starfsemi hjá stofnunum þess.

Starfsmaður grunnskólans á Hvammstanga greindist smitaður af kórónuveirunni í gær og hefur skólahald verið fellt niður um óákveðinn tíma vegna þess. Á vefsíðu Húnaþings vestra kemur fram að 57 einstaklingar hafi farið í sóttkví vegna þess í gærkvöldi en þeim hafi fjölgað verulega í dag. Alls eru 130 heimili í sveitarfélaginu í sóttkví.

Kaupfélag Vestur-Húnvetninga auglýsti að verslunin þyrfti að skerða þjónustu og stytta opnunartíma í dag. Á næstu dögum er búist við því að fleiri þurfi að skerða þjónustu í sveitarfélaginu.

„Með því að fara að öllu eftir leiðbeiningum stjórnvalda og heilbrigðisyfirvalda ásamt því að sýna almenna skynsemi mun okkur takast að sigrast á þessari áskorun sem og öllum öðrum,“ segir í tilkynningunni sem Ragnheiður Jóna Ingimarsdóttir, sveitarstjóri, skrifar undir.

Faraldur kórónuveiru (COVID-19) Húnaþing vestra

Tengdar fréttir

Grunnskólanum á Hvammstanga lokað vegna smits starfsmanns

Skólahald í Grunnskóla Húnaþings vestra hefur verið fellt niður um óákveðinn tíma eftir að starfsmaður skólans greindist með kórónuveirusmit.

18. mars 2020 08:19

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.