Sjö greindust innan­lands í gær

Þetta kemur fram í uppfærðum tölum á síðunni covid.is. 142 manns eru nú í einangrun, samanborið við 143 í gær. Þá eru 246 nú sóttkví, samanborið við 239 í gær.

Alls eru 23 nú á sjúkrahúsi vegna Covid-19 og enginn á gjörgæslu. Í gær voru 25 á sjúkrahúsi og þar af einn á gjörgæslu.

Sex greindust smitaðir á landamærum í gær – einn með virkt smit og er niðurstöðu mótefnamælingar beðið í tilvikum fimm.

Af þeim sjö sem greindust innanlands í gær greindust sex eftir svokallaða einkennasýnatöku og einn í sóttkvíar- og handahófsskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 28,9, en var 27,8 í gær. Þá er nýgengi landamærasmita nú 16,9, en var 17,5 í gær.

Alls hafa 5.736 manns greinst með kórónuveiruna hér á landi frá því faraldurinn hófst í lok febrúar. Þá hafa nú 29 dauðsföll verið rakin til Covid-19 á Íslandi frá upphafi faraldursins, en fyrr i dag var greint frá því að einn hafi látist af völdum Covid-19 á Landspítalanum í gær. Sá var á áttræðisaldri.

Alls voru tekin 932 einkennasýni hjá sýkla- og veirufræðideild Landspítalans og Íslenskri erfðagreiningu í gær og 581 sýni á landamærunum eða í seinni landamæraskimun. Þá voru tekin 28 sýni í svokallaðri sóttkvíar- og handahófsskimun.

Fréttin hefur verið uppfærð.