Erlent

Sagði af sér eftir örfáa daga í embætti

Elín Margrét Böðvarsdóttir skrifar
Manuel Merino, forseti Perú, sagði af sér í dag eftir aðeins nokkra daga í embætti.
Manuel Merino, forseti Perú, sagði af sér í dag eftir aðeins nokkra daga í embætti. EPA

Manuel Merino, forseti Perú, sagði af sér í dag eftir aðeins nokkra daga í embætti. Merino sagði af sér í kjölfar mikilla mótmæla sem staðið hafa yfir síðan ríkisstjórn hans tók til starfa en tveir ungir menn, 24 og 25 ára, létust í mótmælunum í gær.

Merino gegndi áður stöðu þingforseta en hann tók við embætti forseta af Martín Vizcarra sem þurfti að víkja úr embætti í síðustu viku eftir að vantrauststillaga á hendur honum var samþykkt vegna ásakana um mútugreiðslur sem Vizcarra vísar á bug.

Valdamiklir stjórnmálamenn höfðu kallað eftir því að arftaki hans, Manuel Merino, myndi víkja strax aftur úr embætti í ljósi ofbeldisfullra mótmæla sem brutust út gegn ríkisstjórn hans. Tólf ráðherrar úr nýskipaðri ríkisstjórn Merino sögðu af sér í dag í mótmælaskyni við lögregluofbeldi og það hvernig Merino hafi tekist á við ástandið.

Tugþúsundir mótmælenda, að miklu leyti ungt fólk, hafa tekið þátt í mótmælum undanfarna daga til að andmæla ákvörðun þingsins um að víkja Vizcarra úr embætti. Mótmælendur saka þingið um valdarán en Vizarra hefur notið stuðnings meðal margra kjósenda á vegferð sinni til að stuðla að umbótum.

Mótmælin í höfuðborginni Lima í gær fóru að mestu leyti friðsamlega fram en til átaka kom þegar tók að líða undir kvöld og kom til stimpinga milli lögreglu og mótmælenda.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×