Gæti snúið aftur í landsliðið á fæðingarári tvíburanna: „Ekkert heyrt í Jóni Þór“

„Maður var búinn að gleyma því hvað fótbolti getur verið ógeðslegur,“ segir Guðbjörg Gunnarsdóttir og kímir, eftir að hafa spilað sinn fyrsta leik síðan í júní á síðasta ári,.

Guðbjörg, sem hefur varið mark Íslands á þremur stórmótum, fæddi tvíbura þann 31. janúar síðastliðinn. Hún varð 35 ára í vor en var ákveðin í að snúa aftur á fótboltavöllinn og það markmið náðist á sunnudaginn, með Djurgården í afar svekkjandi 3-2 tapi gegn Eskilstuna í sænsku úrvalsdeildinni.

Guðbjörg sló danska landsliðsmarkvörðinn Kathrine Larsen út úr byrjunarliðinu, tíu dögum eftir að Larsen hafði varið mark Danmerkur í 4-0 sigri gegn Ísrael í undankeppni EM. Hún kemur væntanlega til greina þegar Jón Þór Hauksson velur síðar í þessum mánuði landsliðshóp sinn fyrir síðustu tvo leikina í undankeppni EM, sem ráða möguleikum Íslands á að komast á lokamótið í Englandi sumarið 2022.

„Það kom mér á óvart hvað ég er góð í líkamanum. Það sem er erfiðast er allt þetta sem þarf að takast á við utan vallar. Að fá svona lítinn svefn, vera alltaf að redda pössun og svona. En líkamlega líður mér þvílíkt vel og er eins og lítill krakki að mæta á æfingar því mér finnst þetta svo gaman. Miðað við það langar mig auðvitað rosalega að spila á EM 2022 en það þarf allt að smella saman með fjölskyldunni til að það gangi upp,“ segir Guðbjörg.

„Finnst ég í geggjuðu standi“

Endurkoman á sunnudag virtist ætla að verða draumi líkust en það breyttist þegar Eskilstuna skoraði tvö mörk í blálokin, þar af sigurmark sem Guðbjörg leit illa út í. Það skyggði því á langþráða endurkomu.

„Ég var eiginlega búin að gleyma þessum hluta af íþróttinni. Ég var búin að æfa eins og geðsjúklingur og hlakka svo til að spila, finnst ég í geggjuðu standi, og það hvarflaði ekki að mér að einhverjar svona tilfinningar yrðu í gangi eftir þennan leik. Maður vinnur og tapar fótboltaleikjum en þetta var ógeðslegt tap, alveg í lokin,“ segir Guðbjörg.

Hún er þó greinilega að nálgast sitt fyrra form fyrst þjálfari Djurgården valdi hana í leikinn mikilvæga við Eskilstuna, sem var með sama stigafjölda og Djurgården fyrir leik. Djurgården er nú einu stigi frá fallsæti, fyrir ofan Umeå sem er einmitt næsti andstæðingur liðsins.

Vann sig inn í liðið og framundan er úrslitaleikur

„Ég er mjög stolt og ánægð að hafa fengið tækifæri, í svona mikilvægum leik. Mér finnst ég hafa sýnt það síðustu fjórar vikur á æfingum að ég eigi skilið að spila en svo er bara mikil samkeppni hérna. Við erum með markmann úr danska landsliðinu og aðra sænska sem einnig er góð, svo ég vissi að það yrði „brekka“ að fá sæti í liðinu, hjá þjálfara sem ég hafði ekki spilað fyrir áður,“ segir Guðbjörg, og bætir við:

„Ég var mjög glöð að fá þetta tækifæri, þó mér hafi fundist ég geta fengið það fyrr, en ég er því auðvitað enn svekktari að þetta skyldi enda svona. Ég var alveg „stabíl“ í leiknum en pínu ósátt við sjálfa mig í síðasta markinu. Vonandi fæ ég að spila áfram í síðustu tveimur leikjum tímabilsins. Næsti leikur er bara upp á það hvort að Djurgården verði í Allsvenskan á næsta ári eða ekki. Þetta er mjög skemmtileg deild, fyrir umferðina í gær gátu enn sex lið fallið, svo þetta er rosalega jafnt.“

Aðspurð um möguleikann á því að hún spili með Íslandi gegn Slóvakíu og Ungverjalandi um næstu mánaðamót, í leikjum sem gætu skilað Íslandi á EM fjórða skiptið í röð, segir Guðbjörg:

„Ég hef ekki alveg hugsað það, þar sem ég hef bara ekkert heyrt í Jóni Þór [landsliðsþjálfara]. En ef að mér tekst að halda dönskum landsliðsmarkverði á bekknum og standa mig, þá hlýt ég að eiga erindi í íslenska landsliðið. Ég hef alltaf trú á því að standi maður sig vel á háu getustigi þá komist maður í landsliðið,“ segir Guðbjörg.

Fengið tilboð frá Noregi, Svíþjóð og Kýpur

Næsta stórmót, EM í Englandi, var þó ekki aðalmarkmið hennar með því að komast aftur út á fótboltavöllinn:

„Ég ákvað bara að æfa og komast í gott stand, og sjá hvort ég gæti orðið jafngóð og ég var. Ég hef engan áhuga á að spila ef mér finnst ég ekki geta orðið jafngóð, en núna finnst mér ég bara vera eins og ég var áður en ég eignaðist tvíburana, fyrir utan að vanta leikform.“

Guðbjörg og kærasta hennar, Mia Jalkerud, hafa eftir því sem Vísir kemst næst fengið tilboð frá félögum í Svíþjóð, Noregi og Kýpur fyrir næstu leiktíð, en samningur Guðbjargar við Djurgården er að renna út. Guðbjörg kveðst einbeita sér alfarið að því núna að halda Djurgården í efstu deild, enda sé liðið allt of vel mannað til að falla, og segir að þær Mia muni skoða sín mál eftir tímabilið. Það sé alls ekki útilokað að hún verði áfram hjá Djurgården.