Bæta við einni hæð fyrir fólk í einangrun

Rauði krossinn hefur útbúið 4. hæðina á Hótel Rauðará fyrir einangrun sjúklinga sem eru með Covid-19.

Hingað til hefur Hótel Rauðará verið fyrir fólk í sóttkví og þá aðallega hælisleitendur. Hótel Lind hefur aftur á móti verið nýtt fyrir Covid-19-sjúklinga sem geta af einhverjum ástæðum ekki verið heima hjá sér.

Morgunblaðið greinir frá í dag og hefur eftir Gylfa Þór Þorsteinssyni, umsjónarmanni farsóttarhúsa hjá Rauða krossinum, að hæðin á Hótel Rauðará verði tekin í notkun þegar þörf verður á. Það gæti orðið í dag.

Alls voru 86 gestir í farsóttarhúsunum í gær, þar af 63 í einangrun og 23 í sóttkví. Starfsemin er á fyrrnefndum hótelum en Gylfi Þór segir tímaspursmál hvenær Hótel Lind fyllist af sjúklingum í einangrun og taka þurfi 4. hæðina á Hótel Rauðará í notkun.

Álagið í farsóttarhúsunum hefur verið mun meira í þessari bylgju faraldursins heldur en þeirri fyrstu í vor. Fjölgað hefur verið um tvo starfsmenn og eru þeir nú átta en Gylfi segir í samtali við Morgunblaðið að þörf kunni að vera á því að fjölga starfsfólki enn frekar.