Lífið

Hreyfing vanmetinn hluti af krabbameinsmeðferð

Sylvía Rut Sigfúsdóttir skrifar
Atli Már Sveinsson og Haukur Guðmundsson voru gestir Sigríðar Þóru Ásgeirsdóttir í nýjasta þætti Krafts hlaðvarpsins Fokk ég er með krabbamein.
Atli Már Sveinsson og Haukur Guðmundsson voru gestir Sigríðar Þóru Ásgeirsdóttir í nýjasta þætti Krafts hlaðvarpsins Fokk ég er með krabbamein. Vísir/Vilhelm

Líkamleg endurhæfing er mikilvægur þáttur í bataferli þeirra sem greinast með krabbamein. Hér á landi er til dæmis bæði hægt að sækja þjálfun og æfingar í gegnum félögin Kraft og Ljósið. Þjálfarar segja að það geti verið mjög hvetjandi að æfa með fólki sem hefur einnig greinst með krabbamein.

„Það er svo gott að geta hitt einhvern sem að hefur verið að ganga í gegnum sömu eða svipuð spor og jafnvel æfa með þeim. Svo er líka gott fyrir þá sem eru að koma nýir inn að hitta þá sem eru kannski búnir að vera að æfa lengur, eru búnir að ná meiri framför, það gefur líka,“ segir Atli Már Sveinsson í hlaðvarpinu Fokk ég er með krabbamein en hann er íþróttafræðingur sem vinnur hjá Krafti.

Í þessum fjórða þætti hlaðvarpsins er áherslan á hreyfingu og endurhæfingu, sem er viðeigandi þar sem margir hlauparar safna áheitum fyrir Kraft þessa stundina í tilefni af Reykjavíkurmaraþoninu. Þó að því hafi verið aflýst er fólk hvatt til að hlaupa á stað að eigin vali og er áheitasöfnunin í fullum gangi á síðunni Hlaupastyrkur. Áheitasöfnunin stendur í rúmum 46 milljónum þegar þetta er skrifað. Þar á meðal eru einstaklingar sem hafa fengið þjónustu Krafts og Ljóssins í veikindum eða sem aðstandandi einstaklings með krabbamein.

Sigur að geta gert bara eitthvað

Haukur Guðmundsson sjúkraþjálfari hjá Ljósinu segir að einstaklingar í endurhæfingu séu aðdáunarverðir.

„Það sem er kannski merkilegt að sem sjúkraþjálfari hef ég bæði unnið með almenna einstaklinga og svo krabbameinsgreinda og hinn meðal krabbameinsgreindi einstaklingur er eins og að vinna með íþróttamanneskju sem er virkilega „mótíveruð“ til þess að ná árangri og virkilega gera allt sem í valdi sínu stendur til að ná áfram.“

Í faraldri kórónuveirunnar hafa einstaklingar líka fengið æfingar til að gera heima, allt frá stólaleikfimi yfir í meira krefja æfingar, jafnvel með lóðum. Þjálfarar segja mikilvægt að sníða þjálfunina að hverjum einstaklingi, einnig út frá líkamlegu formi fyrir veikindin.

Báðir segja að stundum þurfi að bremsa of ákafa einstaklinga af, til að tryggja að þessir einstaklingar klári ekki batteríin, enda eru dagarnir í svona veikindum misjafnir.

„Fyrir flesta er sigurinn að geta komið sér fram úr og geta gert eitthvað,“ segir Haukur. Atli tekur undir þetta. Hann segir að margir syrgi jafnvel gamla líkama sinn og gamla formið fyrir veikindin og fái samviskubit yfir því. 

Þáttastjórnandinn Sigríður Þóra Ásgeirsdóttir ræðir í fyrri hluta þáttarins við Atla Má Sveinsson, íþróttafræðing sem er sérhæfður í þjálfun krabbameinsgreindra hjá FítonsKrafti og Hauk Guðmundsson, sjúkraþjálfara og jógakennara sem er sérhæfður í þjálfun krabbameinsgreindra hjá Ljósinu. Í seinni hlutanum er rætt við Söru Snorradóttur um hennar baráttu við sjúkdóminn og þjálfunina á meðan krabbameinsmeðferðinni stóð.

Hægt er að hlusta á þáttinn í heild sinni í spilaranum hér fyrir neðan og á helstu efnisveitum.


Tengdar fréttir

„Við vorum búin að afskrá þennan sjúkdóm“

Margir Íslendingar ætla að hlaupa til góðs á laugardaginn og safna áheitum þrátt fyrir að Reykjavíkurmaraþoninu hafi verið aflýst. Þar á meðal er María Erla Bogadóttir sem hleypur í minningu bróður síns. Ingi Björn lést þann 14. júlí síðastliðinn eftir erfiða baráttu við krabbamein.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.