Enski boltinn

Englendingar vonast til að hleypa stuðnings­mönnum inn á heima­leikinn gegn Ís­landi

Anton Ingi Leifsson skrifar
Englendingar fagna marki.
Englendingar fagna marki. vísir/getty

Það verða engir áhorfendur á leik Íslands og Englands í septembermánuði er liðin mætast í Þjóðadeild UEFA á Laugardalsvelli. Það gætu þó verið áhofendur á síðari leik liðanna ytra.

UEFA ákvað að það yrðu engir áhorfendur á landsleikjunum í september og þetta staðfesti Knattspyrnusambandið í gær á vef sínum.

Nokkur lönd voru tilbúin að hleypa fólki á völlinn í september en UEFA tók þá ákvörðun að allir leikirnir færu fram án áhorfenda.

Mark Bullingham, framkvæmdastjóri enska knattspyrnusambandsins, skilur ákvörðunina en vonast til þess að það verði breytingar í október.

„Við vonum að í leikjunum þremur í október verði breytingar og við getum fengið að hafa áhorfendur á Wembley,“ sagði Mark.

„Við munum vinna það með UEFA og ríkisstjórninni. Við erum ekki að tala um fullan völl en að hleypa einhverjum inn á völlinn.“

England spilar æfingarleik gegn Wales í október sem og Þjóðadeildarleiki gegn Belgíu og Danmörku.

Í nóvember er það svo síðari leikurinn gegn Íslandi á Wembley og útileikur gegn Belgíu.

„Það var pressa. Við viljum öll fá áhorfendur aftur til baka á völlinn. Þeir eru mikilvægir fyrir fótboltann og það voru miklar umræður um þetta.“

„Sum lönd eru í erfiðum aðstæðum. Þeim líður vel með að hleypa áhorfendum á leikina og eru með stuðning ríkisstjórnarinnar.“

„UEFA vildi gæta sanngirni í september og þannig var það. Þeirra sýn var bara að leikirnir gætu farið fram. Klárum þessal eiki í september og kíkjum á þetta í október.“

„Það gæti svo farið að þetta verði öðruvísi í október fyrir mismunandi lönd því veiran er svo erfið að spá fyrir um.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.