Elmar lykilmaður í sigri á toppliðinu

Theódór Elmar Bjarnason var í miklu stuði þegar lið hans Akhisarspor vann góðan 3-2 sigur gegn toppliði Hatayspor í tyrknesku B-deildinni í fótbolta í dag.

Hatayspor var á heimavelli og komst yfir í leiknum en Akhisarspor jafnaði á 10. mínútu. Elmar lagði svo upp mark á 42. mínútu og skoraði sjálfur tveimur mínútum síðar, og kom sínu liði í 3-1. Þetta var fyrsta deildarmark Elmars fyrir liðið. Heimamenn minnkuðu muninn á 78. mínútu en þar við sat.

Akhisarspor er því komið upp í 5. sæti með 32 stig en liðin í 3.-6. sæti fara í umspil um sæti í úrvalsdeild. Liðið er sex stigum á eftir Erzurumspor sem er í 2. sæti, og tíu stigum á eftir Hatayspor.