Finnur og lærisveinar hans máttu þola stórt tap

Finnur Freyr Stefánsson og lærisveinar hans í Horsens í danska körfuboltanum máttu þola stórt tap gegn Bakken Bears í kvöld. Lokatölur 103-70.

Finnur Freyr tók við danska úrvalsdeildarliðinu síðasta sumar og hefur náð ágætis árangri. Til að mynda er liðið komið í úrslit danska bikarsins. Hann gerði KR að fimmföldum Íslandsmeisturum áður en hann tók sér smá frí frá meistaraflokksþjálfun og þjálfaði á meðan yngri flokka Vals. Síðasta sumar bauðst honum svo að taka við Horsens í dönsku úrvalsdeildinni.

Í kvöld mættu þeir hins vegar ofjörlum sínum en Bakken Bears tróna á toppi deildarinnar á meðan Horsens er í 2. sæti. Leikurinn náði aldrei neinu flugi en arfaslakur fyrri halfleikur Horsens gerði í raun út um möguleika þeirra að fá eitthvað út úr leiknum. Skoruðu þeir aðeins 28 stig í öllum fyrri hálfleiknum, staðan þá 56-28.

Sóknarleikur Horsens skánaði aðeins í síðari hálfleik en varnarleikurinn var ekki upp á marga fiska. Á endanum tapaðist leikurinn með 33 stiggja mun, lokatölur 103-70.