Innlent

„Umfram allt þá þarf og verður að tryggja öryggi íbúanna til frambúðar“

Jóhann K. Jóhannsson og Tryggvi Páll Tryggvason skrifa
Guðmundur Gunnarsson er bæjarstjóri Ísafjarðarbæjar.
Guðmundur Gunnarsson er bæjarstjóri Ísafjarðarbæjar. Vísir/Egill

Guðmundur Gunnarsson, bæjarstjóri Ísafjarðarbæjar, segir mikilvægt að öryggi íbúa í byggðarlögum þar sem hætta er á snjóflóðum verði tryggt sem fyrst. Hann segir að þörf sé á nýju hættumati og að ráðast þurfi hratt og örugglega í að reisa snjóflóðavarnir þar sem þörf er á.

Augu og hugur þjóðarinnar hefur verið á Vestfjörðum frá því á þriðjudag þegar þrjú stjór snjóflóð féllu, tvö við Flateyri og eitt í Súgandafjörð gegnt Suðureyri.

Sjá einnig: Missti meðvitund og man eftir sér á sjúkrabörunum



Komið hefur fram að snjóflóðin tvö sem féllu séu talin með þeim stærstu sem fallið hafi á varnargarða í heiminum. Varnargarðar voru byggðir til að verja byggðina við Flateyri eftir mannskætt snjóflóð fyrir 25 árum síðan. Engu að síður flæddu snjóflóðin tvö yfir varnargarðana, ollu miklu tjóni á hafnarmannvirkjum auk þess sem unglingstúlka festist í flóðinu, en hún slapp án teljandi meiðsla.

Þörf á nýju hættumati

Jóhann K. Jóhannsson, fréttamaður okkar fór vestur í morgun og ræddi þar við Guðmund, bæjarstjóra Ísafjarðarbær. Viðtalið í heild sinni má sjá hér fyrir neðan.

Hafa Flateyringar búið við falskt öryggi frá því að garðurinnn var reistur?

„Þetta er eðlileg spurning og þetta er spurning sem íbúar eru að spyrja sig. Við erum líka að spyrja þessara spurninga. Það er þá ekkert bara Flateyri heldur allir þessir bæjir þar sem eru ofanflóðavarnir,“ sagði Guðmundur.

Sjá einnig:„Hraðfara massi sem kemur í einu höggi“

Kallaði hann eftir því að fá svör frá sérfræðingum svo hægt væri að fá upplýsingar til að meta nákvæmlega hvað hafi gerst og hvaða áhrif það hafi haft. Þannig verði haldnir íbúafundir með íbúum á Flateyri og Suðureyri eftir helgi. 

„Þegar við erum búin að fá svörin og við erum búin að fá upplýsingarnar er alveg ljóst að það þarf að endurmeta hættuna. Það þarf nýtt hættumat á vel flestum stöðum og í framhaldinu af því getum við farið að ræða hvað raunverulega þarf að gera en umfram allt þá þarf og verður að tryggja öryggi íbúanna til frambúðar,“ sagði Guðmundur.

Heldurðu að það sé ótti á öðrum stöðum?

„Ég get alveg fullyrt það þar sem ég er Bolvíkingur þar sem eru ofanflóðavarnir að fólk annars staðar þar sem er hætta á flóðum og við búum við þetta öryggi sem garðarnir vissulega eru og hafa sýnt fram á þá er fólk að spyrja sig þessara spurninga, já,“ sagði Guðmundur.

Eftir að snjóflóðin féllu hefur verið bent á að framkvæmdir við varnargarða fyrir snjóflóðarvarnargarða væru á eftir áætlun, nógir peningar væru til en engu að síður væri framkvæmdahraði hægur. Guðmundur vill að þetta verkefni verði klárað sem fyrst.

„Við eigum að vera búinn að ganga mikið lengra í að tryggja byggðirnar. Við erum búin að gera heilmikið en við tókum sameiginlega ákvörðun sem þjóð fyrir 25 árum síðan að ganga í þetta verkefni samhent og klára það. Við ættum að vera búin að því. Ofanflóðasjóður er bólginn að fjármagni, það vantar ekki. Það er það sem ríður á. Nú þarf að koma þessu fjármagni á fjárlög og klára þessi verkefni og við eigum að ganga í það,“ sagði Guðmundur en viðtalið í heild sinni má sjá hér að ofan.


Tengdar fréttir

Missti með­vitund í snjónum og man eftir sér á sjúkra­börunum

Alma Sóley Ericsdóttir Wolf, fjórtán ára stúlka sem bjargað var úr snjóflóði sem féll á Flateyri á þriðjudagskvöld, segist hafa verið að kveðja vinkonu sína í netspjalli og fara að halla sér þegar hún heyrði drunur. Þremur sekúndum síðar var hún föst í snjó.

„Hraðfara massi sem kemur í einu höggi“

Tómas Jóhannesson, fagstjóri ofanflóðavarna hjá Veðurstofu Íslands, lýsir snjóflóðinu sem kom úr Skollahvilft fyrir ofan Flateyri á þriðjudagskvöld eins og teppi niður hlíðina sem var allt á mjög mikilli ferð.

Svona er staðan á Flateyri í dag

Vestfirðingar eru farnir að geta ferðast meira á milli staða en opnað hefur verið fyrir umferð um fjölmarga vegi í dag.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.