Sport

CrossFit heimurinn bregst við: „Spenntur fyrir hönd heimsins að við eigum núna eina Frederiksdóttir“

Óskar Ófeigur Jónsson skrifar
Anníe Mist Þórisdóttur og Frederik Ægidius urðu foreldrar í gær en hér sjást þau bíða spennt eftir komu dóttur sinnar fyrir nokkrum dögum.
Anníe Mist Þórisdóttur og Frederik Ægidius urðu foreldrar í gær en hér sjást þau bíða spennt eftir komu dóttur sinnar fyrir nokkrum dögum. Mynd/Instagram

Anníe Mist Þórisdóttur og Frederik Ægidius eignuðust dóttur í gær og það er óhætt að segja að þessum gleðifréttum hafi verið vel tekið í CrossFit heiminum.

Í morgun höfðu 151 þúsund manns líkað við færslu Anníe Mistar um fæðinguna á Instagram og yfir 3600 sent kveðju í athugasemdum.

Stórstjörnur úr CrossFit heiminum eru í þessum stóra hópi fólks sem gladdist yfir fæðingu erfingjans enda Anníe Mist Þórisdóttir og Frederik Ægidius í hópi þeirra sem farið hafa oftast á heimsleikana í CrossFit undanfarinn áratug.

Táknræn mynd og Instagram síðu Anníe Mistar Þórisdóttur og Frederik Ægidius.Mynd/Instagram

Það er skemmtilegt að renna yfir kveðjurnar og hvaða þær koma. Hér fyrir neðan eru nokkrar þeirra.

„Til hamingju. Svo ánægð fyrir hönd ykkar beggja,“ skrifaði heimsmeistari síðustu þriggja ára, Tia-Clair Toomey.

Annar margfaldur heimsmeistari eins og Anníe Mist og Tia er Katrín Tanja Davíðsdóttir sem sendi að sjálfsögðu kveðju. „Hjartað mitt má held ég bara springa. OHHHHHHH litla Frederiksdóttir sem ég get ekki beðið eftir að fa að kynnast & knúsa!,“ skrifaði Katrín Tanja.

Fjallið, Hafþór Júlíus Björnsson, hefur fengið að æfa með Anníe Mist og Frederik og þekkir þau orðið vel. „Innilega til hamingju elsku vinir,“ skrifaði sterkasti maður Íslands undanfarin tíu ár.

Það er líka ljóst að væntingar sumra til íslenska CrossFit barnsins eru töluverðar.

Dæmi um það er kveðja reynsluboltans Cole Sager sem hefur keppt á heimsleikunum undanfarin sex ár, náði best fimmta sætinu árið 2016 og varð ellefti í fyrra. „Anníe og Frederik. Til hamingju bæði. Ég er svo ánægður fyrir ykkar hönd og einnig spenntur fyrir hönd heimsins að við eigum núna eina Frederiksdóttir,“ skrifaði Cole Sager.

„Til hamingju með litlu prinsessuna ykkar,“ skrifaði hin norska Kristin Holte, sem varð í öðru sæti á heimsleikunum í fyrra og hefur verið meðal sjö efstu undanfarin þrjú ár.

„Yayyyyy. Ég hef verið að hugsa mikið til þín undanfarna dag og að bíða eftir að hún kæmi í heiminn. Til hamingju manna,“ skrifaði Amandaj Barnhart sem varð í sjöunda sæti á síðustu heimsleikum.

„Til hamingju Anníe og Frederik. Guð minn góður Frederiksdóttir,“ skrifaði Brooke Wells sem er annar reynslubolti frá heimsleikunum sem náði best sjötta sætinu árið 2016.

Hin ástralska Kara Saunders þekkir það vel að eignast barn og koma aftur í CrossFit íþróttina eins og Anníe Mist ætlar sér. „Til hamningju með þetta bæði. Þetta er besta tilfinningin,“ skrifaði Kara Saunders sem eignaðist dóttur í um mitt ár í fyrra og var farin að keppa níu mánuðum síðar.

„Jæja þá er ég orðinn Björgvin frændi,“ skrifaði Björgvin Karl Guðmundsson, besti CrossFit maður Íslands frá upphafi.

Það eru auðvitað miklu fleiri kveðjur og þær má finna undir færslu Anníe Mistar á Instagram sem er hér fyrir neðan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.