Forstjóri Huawei segir 5G ekki opna leið til njósna

Forstjóri Huawei á Norðurlöndum sem kínversk stjórnvöld eða leyniþjónustustofnanir ekki geta nýtt sér 5G búnað fyrirtækisins til að komast inn í kerfi stjórnvalda annarra landa. Íslensk stjórnvöld hafi ekki óskað eftir fundi um búnaðinn.

Bresk stjórnvöld létu nýlega undan þrýstingi frá Bandaríkjastjórn og bönnuðu 5G búnað frá kínverska tæknirisanum Huawai.

Mike Pence varaforseti Bandaríkjanna fullyrti meira um afstöðu íslenskra stjórnvalda en hann gat staðið undir þegar hann kom hingað til lands hinn 4. september í fyrra. Hann fundaði fyrst með Guðlaugi Þór Þórðarsyni utanríkisráðherra í Höfða og síðan Katrínu Jakobsdóttur forsætisráðherra á Keflavíkurflugvelli skömmu fyrir brottför sína frá landinu.

„Hingað til hafa Íslendingar hafnað belti og braut framtaki Kínverja. Við ræddum einnig í dag og getum ef til vill rætt aftur hér áhyggjur Bandaríkjanna vegan 5G og vilja okkar til að vinna með Íslandi og öðrum frelsis elskandi þjóðum við að finna aðrar lausnir en lausnir á grundvelli kínverska ríkisins,” sagði Pence í upphafi fundar síns með Katrínu á Keflavíkurflugvelli.

Fréttamaður greip hann á orðinu og spurði:

„Herra varaforseti. Það eru fréttir að íslensk stjórnvöld hafi hafnað belti og braut. Hefur utanríkisráðherra Íslands staðfest þetta?”

Katrín hleypti varaforsetanum ekki að og sagði:

„Við ætlum ekki að taka við spurningum. En eins og þú veist hafa íslensk stjórnvöld ekki opnað fyrir belti og braut. Það hefur verið í skoðun en við höfum ekki opnað á það,” sagði Katrín.

Donald Trump Bandaríkjaforseti segir Huawei nátengt kínverskum stjórnvöldum sem geti í gegnum 5G búnað fyrirtækisins komist inn í innstu kerfi annarra stjórnvalda.

Kenneth Fredriksen forstjóri Huawei á Norðurlöndum segir engar bakdyr í búnaði Huawei fyrir kínversk stjórnvöld til að komast inn í kerfi sem tengjast búnaðinum.

„Það er líka mikilvægt að gera sér grein fyrir að við leggjum aðeins til tækin. Viðskiptavinir okkar reka kerfin og það er í þeim sem öryggisráðstafanirnar eru gerðar,” segir Fredriksen. Það sé miður að stjórnmálum og tækni sé blandað saman eins og gerst hafi í Bretlandi.

Óttastu að önnur ríki NATO fylgi á eftir Bretum?

„Raunveruleikinn er sá að við erum í miðjum klíðum að setja upp búnað í flestum ríkjum Evrópu. Þeirra á meðal flesum ríkjum Norðurlanda. Þannig að ég tel þetta ekki vera mikið áhyggjuefni. Ég tel flest ríki geta tekið yfirvegaðar og góðar ákvarðanir í þessum efnum. Ég tel að Ísland eigi einnig að gera það. Taka sjálfstæðar ákvarðanir,” segir Fredriksen.

Sigurður Ingi Jóhannsson samgönguráðherra kannast ekki við neinn beinan þrýsting frá Bandaríkjamönnum en segir þessi mál í skoðun í ráðuneytinu. Fredriksen segir fulltrúa Huawei ekki hafa fundað með íslenskum ráðmönnum en muni fúslega veita þeim allar nauðsynlegar upplýsingar.

„Ef þeir hafa áhuga á fyrirtæki okkar væri ég meira en reiðubúinn til að deila upplýsingum um okkur. Vegna þess að við höfum þjónað Íslandi undanfarin tíu til fimmtán ár,” sagði Fredriksen. Hann teldi Ísland búa við eitt þróaðasta fjarskiptakerfi fyrir farsíma í Evrópu og einn virkasta samkeppnismarkaðinn.

Þess skal getið að Vodafone er að setja upp 5G búnað frá Huawai og er í eigu Sýnar eins og Stöð 2.