Erlendum leikmönnum snarfækkað í Pepsi Max deild karla

Erlendum leikmönnum í Pepsi Max deild karla hefur fækkað hratt undanfarin ár. Árið 2017 voru hér 82 erlendir leikmenn en þeir eru aðeins 25 í dag. Vert er að nefna að af 25 sem eru í dag voru 12 af þeim hér sumarið 2017 og hafa verið síðan.

Leifur Grímsson birti áhugaverða samantekt á Twitter-síðu sinni þar sem í ljós kemur að erlendir leikmenn voru 33 prósent allra leikmanna Pepsi Max deildarinnar sumarið 2017. Nú eru þeir aðeins þrettán prósent.

Hér að neðan má sjá samantekt á þeim erlendum leikmönnum sem leika í Pepsi Max deild karla þetta sumarið.

Topplið Vals er með sex erlenda leikmenn á sínum snærum. Aðeins einn þeirra er þó að leika sitt fyrsta tímabil hér á landi. Það er Færeyingurinn Magnus Egilsson sem fylgdi Heimi Guðjónssyni frá tíma hans með HB þar í landi. Landi hans Kaj Leo í Bartalsstovu kom hingað til lands 2016 er hann gekk í raðir FH. Þaðan fór hann til Vestmannaeyja áður en hann samdi við Valsmenn á síðasta ári.

Þá eru þrír Danir í liði Vals. Rasmus Steenberg Christiansen kom hingað fyrst árið 2010. Hann lék með ÍBV frá 2010 til 2012 en færði sig þá um set til Noregs. Rasmus samdi svo við KR fyrir tímabilið 2015 en færði sig um set í Reykjavík og gekk í raðir Vals ári síðar. Þar hefur hann verið ef frá er talið lán til Fjölnis á síðustu leiktíð er hann var að jafna sig af meiðslum.

Markahrókurinn Patrick Pedersen samdi fyrst við Valsmenn árið 2013. Hann hefur reynt fyrir sér erlendis í tvígang en endar alltaf aftur í herbúðum Vals. Þetta er hans sjöunda sumar á Íslandi. Þá kom miðjumaðurinn Lasse Petry Andersen til Vals fyrir síðasta tímabil og er hér enn.

Sjötti erlendi leikmaður Vals er Svínn Sebastian Starke Hedlund en hefur leikið á Hlíðarenda síðan um mitt sumar 2018.

Rétt eftir að fréttin fór í loftið opinberuðu Valsmenn það að þeir hefðu fengið Kasper Högh á láni frá Randers FC í Danmörku. Hann varð þar með 26. erlendi leikmaður deildarinnar og sjöundi erlendi leikmaðurinn í herbúðum Vals.

Hjá Íslandsmeisturum KR eru þrír erlendir leikmenn en allir hafa leikið hér um árabil.

Danski hægri bakvörðurinn Kennie Knak Chopart kom fyrst til Íslands sumarið 2012 og hefur verið hér allar götur síðan ef frá er talið sumarið 2014. Er þetta hans fimmta tímabil með KR. Líkt og Kennie þá kom El-Salvadorinn Pablo Oshan Punyed Dubon hingað til lands 2012. Hann nálgast nú óðfluga 200 leikja múrinn í deild, bikar og Evrópu.

Tobias Bendix Thomsen, samlandi Kennie, hefur verið hér síðan 2017 en hann stefnir þó á að flytja til Danmerkur þegar tímabilinu lýkur. Mögulega fyrr ef aðstæður leyfa.

Hjá Fylki er einn erlendur leikmaður á mála. Djair Terraii Carl Parfitt-Williams samdi við Árbæinga fyrir tímabilið og hefur staðið sig með prýði.

Í liði Breiðabliks eru Kwame Quee og Thomas Mikkelsen þeir einu sem eru ekki með íslenskt ríkisfang. Kwame hefur verið hér á landi síðan 2017 er hann gekk í raðir Víkings Ólafsvíkur, sem léku þá í Pepsi deildinni.

Mikkelsen gekk til liðs við Blika fyrir sumarið 2018 og hefur raðað inn mörkum síðan. Er hann með 40 mörk í 49 leikjum.

FH-ingar eru með þrjá erlenda leikmenn. Þá Steven Lennon, Morten Beck Andersen og Gunnar Nielsen.

Lennon kom hingað til lands frá Skotlandi árið 2011 og er af mörgum talinn einn besti erlendi leikmaður sem hefur leikið hér á landi. Hann lék með Fram frá 2011 til 2013 en samdi við FH um mitt sumar 2014. Hefur hann verið þeirra besti leikmaður síðan.

Markvörðurinn Gunnar Nielsen gekk til liðs við Stjörnuna árið 2015 en samdi við FH ári síðar. Hann er því á sínu sjötta tímabili hér á landi. Daninn Morten Beck samdi við KR fyrir sumarið 2016 en hélt aftur til Danmerkur að tímabili loknu. Hann samdi svo við FH um mitt síðasta sumar.

Nikolaj Andreas Hansen er eini erlendi leikmaðurinn í herbúðum Víkings. Hann samdi við Val árið 2016 og hefur verið hér síðan.

Marcus Johansson gekk í raðir ÍA fyrir síðustu leiktíð og er enn fastamaður í liði Skagamanna.

Hjá KA eru fjórir erlendir leikmenn. Þeir Jibril Antala Abubakar, Kristijan Jajalo, Mikkel Qvist og Rodrigo Gomes Mateo. Þeir Abubakar og Qvist komu fyrir þetta tímabil en Jajalo og Rodrigo hafa verið hér í dógóðan tíma.

Rodrigo hefur verið hér síðan 2014 og Jajalo frá 2016. Báðir gengu í raðir KA frá Grindavík.

Þá eru nýliðar Grótta með einn erlendan leikmann á sínum snærum. Það er Skotinn ungi Kieran Hugh Dolan Mcgrath sem gekk til liðs við Seltirninga rétt áður en félagaskiptaglugginn lokaði fyrir tímabilið.

Hinir nýliðar deildarinnar, Fjölnir, eru með tvo erlenda leikmenn sem komu einnig undir lok gluggans. Ungverski varnarmaðurinn Peter Zachan og Daninn Christian Justesen Sivebæk.

Þá eru engir erlendir leikmenn hjá HK en Martin Rauschenberg er á mála hjá Stjörnunni. Hann hefur hins vegar ekki enn spilað í sumar.