Íslenski boltinn

Óskar Hrafn eftir sigur Breiðabliks á Gróttu: Ágætt að loka þessum kafla

Runólfur Trausti Þórhallsson skrifar
Óskar Hrafn var ángæður með sigurinn í kvöld.
Óskar Hrafn var ángæður með sigurinn í kvöld. Vísir/Skjáskot

Leikur kvöldsins var sérstakur fyrir Óskar Hrafn Þorvaldsson, þjáfara Breiðabliks, en liðið lagði nýliða Gróttu 3-0 á Kópavogsvelli. Grótta er að spila í efstu deild í fyrsta skipti en liðið hefur undanfarin tvö ár farið upp um tvær deildir. Þá var Óskar Hrafn þjálfari liðsins.

Áður en viðtalið fór af stað heyrðust stuðningsmenn Gróttu syngja miður fallega í áttina til Óskars sem nefndi það kurteisislega að hann ætti enn tvö börn í félaginu.

„Já þetta var ágætis byrjun eins og einhverstaðar stendur. Þetta var fínt en auðvitað hefði maður viljað fleiri mörk. Þrjú eru samt nóg og gaman að Kristinn Steindórsson hafi sett punktinn yfir i-ið, hann átti það svo sannarlega skilið,“ sagði Óskar um frammistöðu Blika í leiknum en Kristinn skoraði þriðja og síðasta mark Blika í leiknum.

Blikar fengu urmul færa í kvöld og hefðu þau geta orðið töluvert fleiri.

„Við töluðum um það fyrir leik að bera virðingu fyrir þeim færum sem við fáum og þeim stöðum sem kæmu upp í leiknum. Mögulega voru menn of kærulausir á köflum en ég ætla ekki að kvarta.“

Það kom nokkuð á óvart að Blikar skyldu spila með hefðbundna fjögurra manna varnarlínu í dag eftir að Óskar hafði gefið út að hann vildi helst spila með þriggja manna línu. Þá kom það nær öllum á óvart að Andri Rafn Yeoman – einn besti miðjumaður deildarinnar undanfarin ár – hafi verið í hægri bakverðinum.

„Nei nei, við höfum daðrað við þessa leikaðferð í vetur og Andri Rafn gæti eflaust spilað í marki ef þess þyrft. Hann er ótrúlegur leikmaður og ótrúlegur maður. Hann hélt Axel Sigurðarsyni niðri sem er ekki létt verk.“

Þegar undirritaður sá Andra Rafn í hægri bakverðinum bjóst hann við að Andri ætti að stíga upp á miðjuna eins og bakverðir Pep Guardiola hafa gert undanfarin misseri en í stað þess mynnti hann á Dani Alves þar sem hann óð upp og niður hliðarlínuna til að styðja við sóknina.

Óskar hrósaði Gróttu liðinu fyrir mikla og góða baráttu en hann var virkur á hliðarlínunni allt til loka leiksins.

„Maður vill alltaf meira en snýst aðallega um að missa ekki dampinn. Þú getur ekki ákveðið hvenær þú ætlar að setja í gang og það þarf að vera á fullu í 90 mínútur í hverjum einasta leik í þessari deild. Menn hafa ekki efni á að slaka á.“

Að lokum var Óskar spurður út í aðdraganda leiksins en mikið hefur verið rætt og ritað um að hann sé að mæta sínu gamla félagi. Þá hjálpaði ekki að Ágúst Gylfason, fyrrum þjálfari Blika, tók við Gróttu-liðinu eftir að Óskar færði sig um set.

„Það er ágætt að loka þessum kafla en þetta hefur verið í umræðunni síðan í kringum jól, það er að þessi leikur væri yfirvofandi í fyrstu umferð. Ágætt fyrir alla held ég að þessu sé lokið og hægt að snúa sér að öðrum liðum í deildinni svo jú það er gott að þetta er búið.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.