Öllum hjólbörðunum stolið undan bílaleigubíl

Vésteinn Örn Pétursson skrifar 3. júní 2020 08:39

Lögreglustöðin í Reykjanesbæ. Vísir/Vilhelm

Að undanförnu hefur borið á því að brotist hafi verið inn í bílaleigubíla á Suðurnesjum og verðmætum stolið. Þetta kemur fram í tilkynningu frá embætti lögreglustjórans á Suðurnesjum. Síðustu helgi var öllum fjórum hjólbörðunum stolið undan bílaleigubíl einum.

Þar segir að dýrum tækjabúnaði, svo sem framrúðumyndavélum, vélartölvum, útvarpstækjum og miðstöðvum hafi verið stolið. Eins eru dæmi þess að ljósabúnaður bílanna hafi verið fjarlægður.

„Nú síðast um helgina var öllum fjórum hjólbörðunum stolið undan bílaleigubíl.“

Lögregla beinir þeim tilmælum til forráðamanna bílaleiga að ganga vel og tryggilega frá bifreiðum í þeirra eigu eða umsjá. Eins eru forráðamenn bílanna hvattir til að geyma þá ekki á fáförnum stöðum.

Lögreglumál Bílaleigur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.