Menning

Skipar starfs­hóp um Errósetur á Klaustri

Atli Ísleifsson skrifar
Myndlistarmaðurinn Erró hefur á löngum ferli skapað sér orðstír sem einn af leiðandi popplistamönnum Evrópu.
Myndlistarmaðurinn Erró hefur á löngum ferli skapað sér orðstír sem einn af leiðandi popplistamönnum Evrópu. Listasafn Reykjavíkur

Lilja Alfreðsdóttir, mennta- og menningarmálaráðherra, hefur skipað starfshóp um starfsemi og uppbyggingu Erróseturs á Kirkjubæjarklaustri. Er markmiðið með verkefninu að koma upp safni og/eða sýningu um líf og uppvöxt listamannsins og miðla listferli hans í máli og myndum.

Í tilkynningu á vef ráðuneytisins segir að vonir standi til að Errósetur verði listatengdu menningarstarfi til framdráttar og mikilvægur afþreyingar- og fræðslustaður í héraði og á landsvísu.

„Hugmyndin á sér nokkurn aðdraganda en áhugafólk um stofnun Erróseturs kynnti áform sín um málið árið 2011 og Félag um Errósetur var stofnað árið 2012.

Starfshópinn skipa Eiríkur Þorláksson formaður, tilnefndur af mennta- og menningarmálaráðuneyti, Eva Björk Hjarðardóttir oddviti, fulltrúi Skaftárhrepps, og Rúnar Leifsson tilnefndur af mennta- og menningarmálaráðuneyti,“ segir í tilkynningunni.

Rockwell Painting My Autoportrait eftir Erró frá árinu 2009. Myndin er í eigu Listasafns Reykjavíkur.

Einn af leiðandi popplistamönnum Evrópu

Myndlistarmaðurinn Erró hefur á löngum ferli skapað sér orðstír sem einn af leiðandi popplistamönnum Evrópu. „Í verkum fæst hann við fjölbreytt viðfangsefni en kunnastur er hann fyrir málverk þar sem ofgnótt myndheims samtímans er uppspretta fjölbreyttra hugleiðinga meðal annars um neyslusamfélagið, pólitík og samfélagsleg viðfangsefni hvers tíma. Erró ólst upp á Kirkjubæjarklaustri, en hélt síðar til náms í Reykjavík árið 1949, þar sem hann útskrifaðist úr teiknikennaradeild árið 1952 og hélt síðan til frekara náms í Noregi og á Ítalíu,“ segir um myndlistarmanninn.

Haft eftir eftir Lilju að vilji sé til að miðla okkar menningu, sögu og menningararfi á fjölbreyttan hátt og sem víðast um landið. „Það er sérlega ánægjulegt hversu vel hefur tekist til við að byggja upp margvísleg menningarsetur og söfn út um allt land – þangað er gaman að koma, fræðast og upplifa, fyrir alla fjölskylduna. Verkefni af þessu tagi gæti líkað skapað jarðveg fyrir frjótt og gott samstarf, t.d. við listasöfnin og Listaháskóla Íslands,“ segir Lilja.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.