Fjöldi minka allt að sjötíu þúsund

Þrátt fyrir stöðuga aukningu minkaveiða hér á landi hefur stofnstærð minks aldrei verið metin. "Það skiptir öllu máli að vita hvað stofninn er stór ef við eigum að halda honum niðri," segir Áki Ármann Jónsson, forstöðumaður veiðstjórnunarsviðs Umhverfisstofnunar. Kostnaður við veiðarnar hefur síðustu ár verið um fjörutíu milljónir á ári og farið vaxandi. Árleg veiði hefur verið rúmlega sjö þúsund dýr og þykir aukin veiði benda sterklega til þess að stofninn fari sístækkandi. Öðru gegnir um tófur, en þar er vitað að stofnstærð að vori er nálægt fjögur þúsund dýrum. Náttúrustofnun Vesturlands hefur síðustu ár stundað rannsóknir á minkum. "Við erum að reyna að koma stofnstærðinni á hreint. Vonandi gefur það okkur einhverja betri hugmynd," segir Menja von Schmalensee, sviðsstjóri. "Við vitum að minkar eru að deyja af mörgum öðrum orsökum en veiði og stofninn gæti því verið stór." Síðustu árin hefur stofnunin unnið að því að handsama minka á Snæfellsnesi, merkja þá, og sleppa þeim síðan aftur. Minkaveiðimenn skila síðan öllum veiddum minkum, merktum sem ómerktum, til stofnunarinnar til frekari rannsókna. Menja vill koma því á framfæri að þeirra rannsóknir bitni alls ekki á veiðum á mink. "Við erum ekki að taka peninga frá veiðimönnum." Hún segir fé stofnunarinnar vera algerlega aðskilið því fé sem fer til veiða á minkum, nema auðvitað að því leyti að um ríkisfé sé að ræða. Það komi bæði sjálfstætt af fjárlögum og einnig úr vísindasjóðum sem styrki rannsóknir. "Aðalmarkmið okkar með rannsóknunum er að fá niðurstöður sem nýtast við stjórnun veiða. Það hlýtur að vera það sem allir vilja að þeir peningar sem fara í veiðar séu nýttir á sem skilvirkastan hátt." Eftir nokkrar vikur er búist við að stofnstærðin á Nesinu liggi fyrir og að á grundvelli hennar verði í kjölfarið unnt að reikna út stofnstærð minks um allt land.