Tónlist og tíska í blóðinu

Hvort börn fræga og fallega fólksins fæðast með tískuvitund í blóðinu skal látið ósagt. Hitt er víst að merkilega margar stúlkur sem skiptast á að prýða síður tísku- og slúðurblaðanna eru dætur heimsfrægra tónlistarmanna. Allar eiga þær sameiginlegt að hafa vakið athygli fyrir tískuvitund og sérstakan stíl.

Nicole Richie þarf ekki að kynna fyrir neinum þeim sem hefur opnað dagblað eða tímarit síðustu árin. Richie er komin af tónlistarmönnum á alla kanta: hún er ættleidd dóttir Lionels Richie, en kynfaðir hennar var líka tónlistarmaður. Nicole er dáð og dýrkuð fyrir tískuvitund sína og stíl, þó að sumir vilji þakka stjörnustílistanum Rachel Zoe þá velgengni hennar. Richie lét Zoe þó róa í nóvember síðastliðnum, og ekki hefur tískuvitundin farið forgörðum síðan þá.

Í viðtali við OK! í mars sagðist Richie vinna að eigin tískubiblíu, sem á væntanlega eftir að seljast eins og heitar lummur, miðað við vinsældirnar. Hún er jafnframt með skartgripa- og fylgihlutalínu, sólgleraugnalínu og ilmvatn í burðarliðnum.

Zoe Kravitz hefur enn sem komið er ekki verið jafn áberandi og lagskonur hennar. Hún sést oftast í fylgd með föður sínum, rokkaranum Lenny Kravitz, enda ekki nema átján ára gömul. Feðginin eru tíðir gestir á tískusýningum, og þykir Zoe með eindæmum smekkleg til fara og skapleg á að líta - enda dóttir Kravitz og leikkonunnar gullfallegu Lisu Bonet.

Í marseintaki bandaríska Elle sat Zoe fyrir hjá tískuljósmyndaranum fræga Gilles Bensimon, en sýning með verkum hans stendur einmitt yfir í Hafnarborg um þessar mundir. Myndirnar í Elle hafa vakið töluverða athygli og þegar bíómyndin The Brave One, þar sem Zoe leikur vændiskonu á táningsaldri, kemur í kvikmyndahúsin ætti frægðarstjarna hennar að rísa enn hærra.

Fatahönnuðurinn Stella McCartney er kannski sú stúlknanna sem á mest tilkall til titilsins Tískuvitund 2007. Hún er, eins og flestir vita, dóttir bítilshjónanna Paul og Lindu McCartney. Þó að sumir vilji meina að það sé einmitt ættarnafnið sem hafi skotið Stellu upp á stjörnuhimin tískugeirans segja aðrir að það hafi frekar háð frama hennar. Þegar Stella var ráðin til Chloé, og kom þar í stað Karls nokkurs Lagerfeld, lýsti sá síðarnefndi óánægju sinni með ráðninguna. „Mér fannst að þau hefðu átt að fá stórt nafn til sín. Þau fengu það - en í tónlist, ekki hönnun," sagði hann.

Í seinni tíð hafa flestir þó tekið Stellu í sátt og viðurkennt að hún sé ekki með öllu ónýtur hönnuður. Hönnun hennar virðist að minnsta kosti höfða til fjöldans, og þess er skemmst að minnast þegar fatalína hennar fyrir Hennes og Mauritz seldist upp á korteri, plús mínus nokkrar mínútur.

Kimberley Stewart er dóttir Rod Stewart og fyrstu eiginkonu hans, Alönu. Hún ákvað ung að árum að tískubransinn væri það sem koma skyldi í lífi hennar, og fór því í fyrirsætuskóla. Kimberly er á mála hjá umboðsskrifstofunni Nous models, eins og stalla hennar, Paris Hilton. Í mánuðinum varð hún andlit Adore Moi undirfatalínunnar frá Ultimo, og tók þar með við kyndlinum úr höndum Jade Jagger. Hún hefur þar að auki hannað skó og sína eigin fatalínu, sem hún kallar Pinky Star Fish.

Peaches Geldof er átján ára gömul dóttir írska tónlistarmannsins og Live Aid-gúrúsins Bob Geldof og Paulu Yates heitinnar. Þrátt fyrir ungan aldur hefur Peaches sett mark sitt á breskt samfélag. Hún hefur lagt nafn sitt við tvo veruleikaþætti, kynnti NME-verðlaunin 2007 og skrifað pistla fyrir The Daily Telegraph og tímaritið ELLEgirl svo eitthvað sé nefnt. Í fyrra komst hún svo inn á lista Tatlers yfir topp tíu tískufyrirmyndir ársins, og var yngsta manneskjan á honum.

Elizabeth Jagger er þriðja barn Micks Jagger og hálfsystir Jade. Móðir hennar er fyrirsætan Jerry Hall, og hún á því ekki langt að sækja aðdáun sína á tísku. Lizzy þykir hafa skapað sér sinn eigin stíl, sem er með því eftirsóknarverðasta í tískugeiranum, þar sem langflestir eru með stílistann sinn á hraðvali í símanum.

Lizzy birtist fyrst á tískupöllunum í fylgd móður sinnar, þegar hún var fyrirsæta fyrir Thierry Mugler á fjórtánda aldursári. Síðan þá hefur hún prýtt fjöldann allan af forsíðum tímarita og unnið með ljósmyndurum á borð við Mario Testino, Patrick Demarchelier og David LaChapelle. Hún var jafnframt andlit LCM-línunnar frá Lancome, sem snyrtivörufyrirtækið kynnti í september 2002.

Jade Jagger er dóttir Mick Jagger úr Rolling Stones og Biöncu Jagger, sem þóttu eitt flottasta par áttunda áratugarins. Í kjölfar skilnaðar þeirra varði Jade mestum tíma sínum með móður sinni í New York, en þegar Bianca þurfti að skreppa á Studio 54 var Jade yfirleitt komið fyrir í pössun hjá góðvini hennar, Andy Warhol. Það er því varla nema von að stúlkan þyki oft á tíðum ofursvöl.

Jade skapaði sér nafn sem skartgripahönnuður, og var listrænn stjórnandi skartgripafyrirtækisins Garrard í tíu ár. Því tíu ára tímabili lauk í fyrra, og nú einbeitir Jade sér að merki sínu Jezebel. Undir merki Jezebel heyrir tónlist, fatnaður og lífsstílsvara, og því er Jade hvergi nærri horfin af sjónarsviðinu.