Sverrir til reynslu hjá Viking

Sverrir Garðarsson mun í byrjun næstu viku halda til Noregs þar sem hann mun vera til reynslu hjá úrvalsdeildarliði Viking.

Með félaginu leikur annar Hafnfirðingur, Hannes Þorsteinn Sigurðsson, sem og ungmennalandsliðsmaðurinn Birkir Bjarnason.

Þetta kemur fram í Aftenbladet í dag og segir þar að Sverrir hafi verið með betri leikmönnum FH í sumar.

„Við höfum fylgst lengi með Sverri og verður forvitnilegt að fylgjast með honum á æfingum," sagði hinn þýski Uwe Rösler, þjálfari Viking.

Hannes segir í samtali við Blaðið að Sverrir sé gæðaleikmaður og drengur góður. „Hann getur bæði spilað sem miðvörður og hægri bakvörður. Þetta er leikmaður sem áhorfendur elska. Hann gefur sig allan í hvern einasta leik."