Reynslumikið lið gegn Finnum

Jón Þór Hauksson hefur gefið út byrjunarlið Íslands sem mætir Finnum í vináttuleik ytra í dag.

Dagný Brynjarsdóttir er í byrjunarliðinu en hún er að koma aftur inn í landsliðið eftir að hafa eignast sitt fyrsta barn. Dagný var með íslenska liðinu á Algarve mótinu í Portúgal í febrúar og mars og kom þar inn á sem varamaður í öllum þremur leikjum Íslands.

Sandra Sigurðardóttir stendur í markinu en Guðbjörg Gunnarsdóttir situr á bekknum. Guðbjörg er að koma til baka eftir að hafa farið í aðgerð í vetur.

Liðið sem Jón Þór stillir upp er mjög reynslumikið og að mestu skipað leikmönnum sem hafa verið í liðinu síðustu ár.

Leikur Íslands og Finnlands hefst klukkan 15:30.