Willum lagði upp þegar BATE fór á toppinn | Myndband

Willum Þór Willumsson lagði upp eitt marka BATE Borisov í 4-1 sigri á Zhodino í hvít-rússnesku úrvalsdeildinni í dag. Með sigrinum fór BATE á topp deildarinnar.

Willum var í byrjunarliði BATE sem byrjaði leikinn af miklum krafti og komst yfir strax á 2. mínútu.

Á 11. mínútu lagði Willum svo upp mark fyrir Stanislav Dragun og staða BATE orðin vænleg. Stoðsendinguna má sjá í myndbandinu hér fyrir neðan.

Zhodino minnkaði muninn með sjálfsmarki á 77. mínútu en aðeins tveimur mínútum síðar jók BATE muninn aftur í tvö mörk. Heimamenn bættu svo einu marki við áður en yfir lauk og unnu 4-1 sigur.

Þetta var þriðji sigur BATE í röð. Liðið er með eins stigs forskot á Brest á toppi deildarinnar. Brest á leik til góða á BATE.

Willum hefur komið við sögu í átta deildarleikjum á tímabilinu.