Zlatan orðinn eigandi Hammarby

Færsla sænsku goðsagnarinnar Zlatan Ibrahimovic á samfélagsmiðlum sínum í gær vakti mikla athygli þar sem hann virtist vera að tilkynna um félagaskipti til sænska úrvalsdeildarliðsins Hammarby.

Enginn virtist þó trúa því að Zlatan væri að fara að spila í heimalandinu enda er það ekki raunin.

Zlatan er hins vegar orðinn einn af eigendum Hammarby en hann hefur keypt 50% hlut í AEG (American Anschutz Entertainment Group) sem gerir hann að 25% eiganda í Hammarby en AEG á sömuleiðis stóran hlut í bandaríska knattspyrnuliðinu LA Galaxy sem Zlatan hefur spilað fyrir undanfarin tvö ár.

„Ég hafði gert samkomulag við Hammarby og AEG um að tilkynna þetta þannig að allur heimurinn fengi að vita af þessu. Ekki bara í Svíþjóð heldur út um allan heim. Allir ættu að vita hvað Hammarby er og þegar þú sérð merki þeirra áttu að tengja það við Hammarby,“ segir Zlatan í ítarlegu viðtali við Sportsbladet.

Zlatan er því ekki að fara að spila í sænsku úrvalsdeildinni og við þetta tækifæri staðfesti hann einnig að hann myndi ekki spila í heimalandinu aftur. Hann kveðst engu að síður ætla sér að gera Hammarby að stærsta félagi í Skandinavíu en liðið hafnaði í 3.sæti sænsku úrvalsdeildarinnar á nýafstaðinni leiktíð.

Íslenski Bandaríkjamaðurinn Aron Jóhannsson er á mála hjá Hammarby en nokkrir Íslendingar hafa leikið með félaginu á undanförnum árum.

Zlatan er þó ekki hættur knattspyrnuiðkun og er í leit að nýju félagi en margt þykir benda til þess að hann semji við sitt fyrrum félag á Ítalíu, AC Milan.