Góður leikur Elvars Más Friðrikssonar dugði Borås Basket ekki til sigurs gegn Köping Stars í sænsku úrvalsdeildinni í körfubolta í dag. Lokatölur 75-67, Köping Stars í vil.



Elvar skoraði tólf stig í leiknum í dag, tók fjögur fráköst og gaf tíu stoðsendingar.



Borås var einu stigi yfir í hálfleik, 41-42. Í seinni hálfleik gekk sóknarleikur liðsins illa og það skoraði aðeins 25 stig gegn 34 stigum Köping Stars.



Elvar er næststoðsendingahæsti leikmaður sænsku deildarinnar með 7,0 stoðsendingar að meðaltali í leik. Þá er Njarðvíkingurinn sá tólfti stigahæsti með 16,9 stig að meðaltali í leik.



Þetta var fyrsta tap Borås síðan í 1. umferðinni. Liðið er í 3. sæti deildarinnar með 14 stig eftir níu leiki.