Menning

Sýning um sögu Skólavörðuholtsins

Kolbrún Bergþórsdóttir skrifar
Hér eru þeir að túlka söguna á mismunandi hátt, segir Olga um listamennina.
Hér eru þeir að túlka söguna á mismunandi hátt, segir Olga um listamennina. Fréttablaðið/Sigtryggur Ari

Sýningin Varðað sem stendur nú yfir í Ás­mundar­sal er samsýning fjögurra listamanna af yngri kynslóðinni sem sýna ný verk sem þau hafa unnið innblásin af sögu og umhverfi Skólavörðuholtsins. Listamennirnir eru þau Auður Lóa Guðnadóttir, Helga Páley Friðþjófsdóttir, Loji Höskuldsson og Þorvaldur Jónsson. Sýningunni lýkur á sunnudag.

Aðalheiður Magnúsdóttir og Sigurbjörn Þorkelsson keyptu Ásmundarsal fyrir nokkrum árum í því skyni að tryggja þar áframhaldandi lifandi menningarstarfsemi – og það hafa þau sannarlega gert. Olga Lilja Ólafsdóttir vinnur með þeim í rekstri hússins. „Við höfum lagt mikið upp úr því að kynna okkur sögu hússins og þá merkilegu listastarfsemi sem hefur farið þar fram í gegnum árin,“ segir Olga Lilja.

„Síðasta haust þegar við aug­lýstum eftir umsóknum fyrir sýningar ársins 2019 sóttu um fjórir ungir listamenn sem voru með þá hugmynd að búa til sýningu um sögu Skólavörðuholtsins. Þetta smellpassaði við áhuga okkar á að halda sögu þessa svæðis hátt á loft. Þeirra nálgun í listinni er að einhverju leyti naívísk og hér eru þau að túlka söguna á mismunandi hátt.“

Sérlega skemmtileg útsaumsverk eftir Loja Höskuldsson á sýningunni.

Búr með sígarettustubbum

Loji Höskuldsson sýnir útsaumsverk. Eitt þeirra sýnir fiskabúr. „Á þeim tíma sem Ásmundur Sveinsson rak sýningarsal í húsinu var haldin metnaðarfull skrautfiskasýning. Um 70 tegundir erlendra skraut- og nytjafiska voru fluttar til landsins og sýningin var gríðarlega vel sótt en allt að 7.000 manns komu á hana. Þetta var á þeim tíma þegar fólk reykti inni í sýningarsölum og það átti til að drepa í sígarettum í búrunum,“ segir Olga. Í dagblaði birtist síðan eftirfarandi ábending til sýningargesta: „Blaðið hefir verið beðið um að koma því á framfæri að fiskarnir á sýningunni reyki hvorki nje kæri sig um peninga. Nokkur brögð hafa verið að því, að peningum og sígarettu og vindlastubbum hafi verið fleygt í fiskakerin, með þeim afleiðingum, að nokkrir fiskar hafa drepist.“

„Loji gerir þessu skemmtileg skil, í verki hans eru engir fiskar í búrinu en þar flýtur allt í sígarettustubbum,“ segir Olga Lilja. Í annarri útsaumsmynd endurgerir Loji postulínsstell sem Dieter Roth og Ragnar Kjartansson voru með á sýningu og enn önnur mynd hans sýnir verkið Veðurspámaður eftir Ásmund en verkið var einmitt sýnt fyrst í garðinum fyrir utan Ás­mundar­sal.

Þorvaldur Jónsson túlkar Skólavörðuholtið með frjálslegum hætti.

Frjálslegt Skólavörðuholt

„Í myndum sínum túlkar Þorvaldur Jónsson Skólavörðuholtið með frjálslegum hætti. Í myndum hans leynast alls kyns skemmtilegar tilvitnanir í sögu holtsins. Þar má til dæmis sjá einu járnbrautarlestina sem hefur verið í Reykjavík og flutti grjót frá Öskjuhlíðinni. Lítil lóa leynist á einni mynd og furðuverur sjást á annarri,“ segir Olga. „Helga Páley Friðþjófsdóttir vinnur abstrakt, rannsakar Skólavörðuholtið og leikur sér með form og sameinar þau inn í sinn eigin myndheim. Auður Lóa Guðnadóttir sýnir meðal annars verk af þremur nöktum dansandi konum. Verkið sýnist vera úr postulíni en er gert úr pappamassa. Módelteikning hefur í tímans rás verið mikilvægur þáttur í myndlistarkennslu, en Myndlistar­skóli Reykjavíkur var lengi vel til húsa í Ásmundarsal. Auður Lóa er þarna að vísa í kvenlíkamann sem lengi hefur verið áberandi mótív sem heillað hefur myndlistarmenn. Hún hefur líka gert pottaplöntur fyrir þessa sýningu en þær sáust oft á myndlistarsýningum hér áður fyrr innan um verk listamanna.“
 

Blað á menningarnótt

Í tengslum við sýninguna kom út ljóðabókin Varðað eftir Skarphéðin Bergþóruson, en hann vann með listamönnunum að sýningunni. Sérstakt blað kemur síðan út á Menningarnótt, Upp í hæstu hæðir. „Við höfum safnað saman ótrúlega miklu af skemmtilegu efni um sögu Skólavörðuholtsins og hússins og gefum út átta síðna blað á menningarnótt um þessa sögu. Gestir og gangandi geta komið hingað og fengið sér eintak,“ segir Olga Lilja.

Hljómsveitin Bjartar sveiflur skemmtir gestum á Menningarnótt en einn af meðlimum hljómsveitarinnar, Loji Höskuldsson, er einn af listamönnum sýningarinnar.

Ásmundarsalur verður opinn frá 9-20 á Menningarnótt en dagskráin fer fram á milli klukkan 17-19.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.