Bryndís Lára: Ég er búin að vera hrein hörmung í allt sumar

„Við erum bara hrikalega sáttar. Svolítið skrýtið að vera fagna jafntefli, það er eitthvað sem maður vill ekki gera en miðað við standið á hópnum hjá okkur og genginu undanfarið erum við hrikalega ánægðar,“ sagði markvörðurinn og fyrirliðinn Bryndís Lára Hrafnkelsdóttir eftir markalaust jafntefli Breiðabliks og Þórs/KA í Pepsi Max deild kvenna í kvöld.

 

Bryndís Lára átti hreint út sagt frábæran leik í marki gestanna og sá til þess að Þór/KA landaði einu stigi á einum erfiðasta útivelli landsins. Aðspurð hvort þetta væri hennar besti leikur í sumar þá taldi Bryndís það nokkuð augljóst.

„Já klárlega, ég er búin að vera hrein hörmung í allt sumar þannig það var mjög gaman að standa sig loksins vel. Ég var reyndar mjög tæp strax á fyrstu mínútu þegar ég missti boltann eftir fyrirgjöf en sem betur fer héldum við hreinu.“

 

Það er langt í næsta leik hjá Þór/KA og stefnir leikmannahópurinn því á að slaka vel á um Verslunarmannahelgina.

„Við erum nokkrar að fara til Eyja að slaka vel á. Svo eru sumir sem fara erlendis svo það er notaleg helgi framundan,“ sagði Bryndís sátt að lokum.