Innlent

Segir ekki eðlilegt að gangast undir skilmálabreytingu um hækkun kaupverðs

Elín Margrét Böðvarsdóttir skrifar

Það er ekki eðlilegt að íbúðakaupendum sé gert að greiða hærra kaupverð en kveðið var á um í kaupsamningi. Þetta segir aðjúnkt í kröfurétti en sala Félags eldri borgara í Reykjavík og nágrenni á 68 íbúðum í Árskógi í Breiðholti hefur vakið þónokkuð umtal. Talsmenn FEB hafa ekki gefið kost á viðtali í dag en tilkynningar er að vænta fljótlega frá félaginu.

Upprunaleg kostnaðaráætlun hljóðaði upp á 3,8 milljarða en við það bættust rétt rúmar 400 milljónir sem Félag eldri borgara hafði vanáætlað, meðal annars vegna hækkunar byggingarvísitölu og aukins fjármagnskostnaðar. Sé þeirri upphæð deilt niður á íbúðirnar 68 nemur hækkun kostnaðarverðs á bilinu 5 til 7 milljónum á hverja íbúð með tilliti til stærðar hverrar íbúðar. 

Kaupendur hafa hver og einn verið boðaðir á fund en samkvæmt upplýsingum frá lögmanni eins kaupenda voru umbjóðanda hans gefnir þrír kostir: Að undirrita skilmálabreytingu þar sem samþykkt er að greiða hærra kaupverð. Til þessa hafa fengist óljós svör um hver réttarstaða þeirra er sem það gera. Í öðru lagi að fara dómstólaleiðina sem geti tekið tíma og gæti haft í för með sér aukinn kostnað, eða í þriðja lagi, að rifta kaupsamningi. Lögmenn sem fréttastofa hefur rætt við í dag eru allir á einu máli um að félag eldri borgara hafi ekki heimild til þess.

Sjá einnig: Segir FEB beita vafasömum vinnubrögðum

„Grundvallaratriðið hlýtur að vera það að það er ekki eðlilegt að gangast undir svona skilmálabreytingar,“ segir Víðir Smári Pedersen, aðjúnkt í kröfurétti við Háskóla Íslands og hæstaréttarlögmaður. Hann segir málflutning félagsins um að dómstólaleiðin sé tímafrek og kostnaðarsöm einnig skjóta skökku við, einkum í ljósi þess að félagið hafi gefið í skyn að það hafi í sjálfu sér engar varnir og það sé í raun að biðla til sinna félagsmanna um að koma til móts við þessa hækkun.

„Ef þú viðurkennir þá skyldu sem er búið að höfða dómsmál um þá er ekkert dómsmál til staðar. Það dómsmál mun ekki taka nema einn dag og vera frekar ódýrt í rekstri af því ef að þú viðurkennir bara skyldu þína til að afhenda fasteignina þá er náttúrlega ekkert dómsmál.“

Nokkrir leitað til Neytendasamtakanna

Málið hefur jafnframt ratað inn á borð Neytendasamtakanna. „Það hafa þrír eða fjórir einstaklingar haft samband við okkur og bæði komið með ábendingar til okkar og fyrirspurn um þetta mál,“ segir Breki Karlsson, talsmaður Neytendasamtakanna. 

„Við sendum Félagi eldri borgara fyrirspurn á föstudaginn var og í kjölfarið ætlum við að hitta þau á fimmtudaginn og fara yfir málið, áður en við myndum okkur einhverja afstöðu, að heyra þeirra hlið á málinu. En svona við fyrstu sýn þá finnst okkur þetta frekar skringilegt,“ segir Breki. 


Tengdar fréttir

Segir FEB beita vafasömum vinnubrögðum

Hæstaréttarlögmaður segir Félag eldri borgara í Reykjavík og nágrenni, FEB, beita vafasömum vinnubrögðum með því að krefja kaupendur íbúða fyrir aldraða í Árskógum um hærra kaupverð.

Eldri borgarar sæta afarkostum

Í síðustu viku voru foreldrar mínir full tilhlökkunar að flytja inn í nýju íbúðina sína. Í dag eru þau brotin og húsnæðislaus. Forsaga málsins er sú að þau festu sér kaup á íbúð í Árskógum sem Félag eldri borgara (FEB) lét byggja fyrir félagsmenn sína.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.