Innlent

Starfsfólk íslensks hótels tók upp klámmyndband á vinnustaðnum

Vésteinn Örn Pétursson skrifar
Húsið sem um ræðir.
Húsið sem um ræðir. Skjáskot

Austfirski staðarmiðillinn Austurfrétt fullyrðir að klámmyndband sem tekið var upp á íslensku hóteli hafi farið í dreifingu á vinsælli klámsíðu um stutta stund í lok síðasta mánaðar. Fólkið sem stóð að myndbandinu hafi verið starfsfólk hótelsins. Það hafi síðan verið látið fara vegna málsins.

Lýsingar sem Austurfrétt vísar í eru á þá leið að myndbandið byrji á hefðbundnum náttúrulífsmyndum af Austurlandi. Því næst sjáist parið ganga nakið um skólabygginguna þar til það færir sig í ákveðið rými innan hússins þar sem fjörið hefst fyrir alvöru. Enginn sem til hússins þekki sé í efa um hvaða hús er að ræða.

„Þetta er saklaust í byrjun, svo verður það sífellt blárra og loks aðeins dökkblátt,“ er haft eftir ónafngreindum Norðfirðingi.

Í fréttinni kemur fram að um sé að ræða sumarhótelið The Cliff, sem rekið er í heimavistarhúsi Verkmenntaskóla Austurlands í Neskaupstað, af Hótel Hildibrand.

Haft er eftir Hákoni Guðröðarsyni, hótelstjóra þar á bæ, að um leið og stjórnendur hótelsins hafi fengið veður af tilvist myndbandsins hafi þeir krafist þess að það yrði fjarlægt af vefnum og að gengið hafi verið frá starfslokum fólksins vegna málsins. Myndbandið hefur verið fjarlægt af vefnum, en þegar það var gert var myndbandið með nokkur þúsund áhorf.

Hákon sagðist í samtali við Vísi ekki vilja tjá sig þegar eftir viðbrögðum hans var leitað. Hann væri búinn að segja allt sem hann vildi sagt hafa um málið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.