Júlíspá Siggu Kling - Vatnsberinn: Ástin er tilbúin ef þú sækist eftir henni

Elsku Vatnsberinn minn, það eru ótrúlega margir og merkir stjórnmálamenn í Vatnsberanum og það er kannski vegna þess að þið hugsið alltaf í lausnum, vinnið hratt og bjargið málunum. Þetta er yndislegur tími sem er í kringum ykkur núna, allt sem öðrum fyndist erfitt verður þér svo ofureinfalt því þú hittir á réttu útkomuna og vefur fólki um fingur þér.

Þegar þér finnst eitthvað eða einhver vera að stöðva lífsflæðið þitt þá er það einhver sem er að kúga þig, svo finndu þér leið að snúa þessu þér í hag og um leið og þú ákveður það þá getur enginn haldið þér niðri.

Hins vegar þarft þú að halda jafnvægi og styrkja og efla, fjölskyldu, vini og þá sem þú vinnur með, það er stór partur af því að þér muni ganga svona vel. Það gerist svo margt með ógnarhraða þessa dagana og þú munt alveg þola það því þú ert eins og bambus, bognar en brotnar aldrei.

Ástin er tilbúin ef þú sækist eftir henni, en þá þarftu að gera það af sál og líkama, af einlægni og heiðarleika, því annað gæti verið köngulóarvefur sem enginn vill lenda í. Framkvæmdu strax þegar þú færð vitrun eða skilaboð til hugans, ekki bíða því þú ert í beinni tengingu við almættið eða máttinn í öllu, svo nýttu þér það.

Lífstalan fimm tengir líka við þig og hún er eins og óútfyllt ávísun, svo skrifaðu niður á þremur mínútum þrjátíu hluti sem þú myndir vilja upplifa ef þú ættir ár eftir ólifað og þar mun koma í ljós hvert þú vilt fara og hver þú vilt vera. Þetta er þinn „bucket“ listi eða ávísun á það sem þú vilt að lífið færir þér og þú munt sjá það gerast eitt af öðru.

Þú ert að velja þér góða félaga og lífsförunaut til framtíðar og þú þarft ekki að ferðast allan heiminn endilangan til að finna hamingjuna, því hún býr í fólkinu sem þú hittir þar sem þú ert hverju sinni og þú munt kunna að meta það, elsku Vatnsberinn minn.

Knús og kveðja, þín Sigga Kling

Vatnsberi 20. janúar - 18. febrúar

Laddi, 20. janúar Geir Sveinsson handknattleiksþjálfari, 27. janúar 

Yoko Ono, listamaður, 18. febrúar 

Bjarni Benediktsson, fjármála- og efnahagsráðherra, 26. janúar 

Katrín Jakobsdóttir, forsætisráðherra, 1. febrúar 

Hilmir Snær Guðnason leikari, 24. janúar 

Rikka fjölmiðlakona, 29. janúar 

Þóra Arnórsdóttir, fjölmiðlakona, 18. febrúar 

Andrea Röfn Jónasdóttir, fyrirsæta, 15. febrúar 

Auðunn Lúthersson, tónlistarmaðurinn Auður, 9. febrúar

Harry Styles, söngvari, 1. febrúar

Ellen DeGeneres, spjallþáttadrottning, 26. janúar

Ed Sheeran, söngvari, 17. febrúar

Justin Timberlake, söng- og leikari, 31. janúar