Stuðningsmenn Barca vilja ekki sjá Neymar

Stuðningsmenn Barcelona eru ekki ýkja spenntir fyrir endurkomu brasilísku stórstjörnunnar Neymar ef marka má könnun Mundo Deportivo.

71,2% svarenda í könnuninni segjast ekki hafa áhuga á að sjá Neymar aftur í Barcelona búningnum en flest þykir benda til þess að þessi 27 ára gamli framherji muni yfirgefa franska stórveldið PSG eftir stormasamt tímabil.

Er talið að Neymar sé að velja á milli spænsku risanna Real Madrid og Barcelona.

Neymar skoraði 105 í 186 leikjum fyrir Barcelona á árunum 2013-2017 og varð tvisvar sinnum spænskur meistari auk þess að vinna Meistaradeild Evrópu árið 2015 þar sem Neymar var markahæsti leikmaður keppninnar ásamt Cristiano Ronaldo og Lionel Messi með 10 mörk.