Neymar þarf ekki að fara í aðgerð

Það hefur gustað um brasilísku knattspyrnuhetjuna Neymar að undanförnu en eftir erfiðar vikur fékk hann loks jákvæðar fréttir þegar í ljós kom að hann þarf ekki að fara í aðgerð vegna meiðsla sem hann hlaut í vináttuleik gegn Katar á dögunum.

Neymar fékk þungt högg á ökklann og var óttast að hann yrði lengi frá. Hann fór strax undir hendur læknateymis PSG og í gær sendi franska stórveldið frá sér yfirlýsingu þess efnis að Neymar þyrfti ekki að fara í aðgerð.

Í yfirlýsingunni kom einnig fram að Neymar ætti að geta hafið æfingar að nýju eftir fjórar vikur en meiðslin gera það að verkum að hann mun ekki taka þátt í Copa America sem senn fer að hefjast í Brasilíu. Hann ætti hins vegar að geta tekið fullan þátt í undirbúningstímabili PSG.