Innlent

Sextán ára á 120 með mömmu í framsætinu

Birgir Olgeirsson skrifar
Ungt barn sat aftur í en mæðginin voru stöðvuð aftur síðar af lögreglu.
Ungt barn sat aftur í en mæðginin voru stöðvuð aftur síðar af lögreglu. Vísir/Vilhelm

Lögreglan á Suðurlandi stöðvaði för 16 ára pilts sem ók á tæplega 120 kílómetra hraða skammt austan við Vík síðastliðinn laugardag. Þetta kemur fram í Facebook-færslu lögreglunnar en þar segir að móðir drengsins hafi setið í farþegasæti bílsins og ungt barn í aftursætinu.

Móðirin gaf þá skýringu að drengurinn væri í æfingaakstri en móðirin gat ekki framvísað neinum pappírum því til staðfestingar. Þá voru engar merkingar um æfingaakstur á bifreiðinni. Móðirin greiddi hraðasektina á staðnum og var henni gert að taka við akstri bifreiðarinnar. Um það bil 4 klukkustundum síðar var sama bifreið stöðvuð aftur skammt vestan við Vík og var 16 ára drengurinn aftur sestur við stýrið. Í þetta skiptið var móðirin kærð fyrir að vera ekki með ökuskírteini meðferðis, geta ekki framvísað gögnum sem sýna fram á æfingaakstur drengsins og fyrir að vera ekki með æfingaakstursmerki á bifreiðinni.

Annars er niðurstaðan sú að 74 voru kærðir fyrir hraðakstur í umdæmi lögreglustjórans á Suðurlandi í liðinni viku og 1217 ökumenn hafa verið kærðir fyrir hraðakstur það sem af er árinu.

Alls voru 41 ökumaður kærðir fyrir hraðakstur um helgina á varðsvæði Víkur og Kirkjubæjarklausturs.

Þeir sem hraðast óku voru á tæplega 140 km hraða.

Alls var posauppgjör hjá Vík og Klaustri samtals 2.250.000 kr fyrir utan þá sem ekki gátu greitt á staðnum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.