Erlent

Óttast fordæmið sem Trump er að setja með baráttu gegn þinginu

Samúel Karl Ólason skrifar
Donald Trump, forseti Bandaríkjanna.
Donald Trump, forseti Bandaríkjanna. AP/Manuel Balce Ceneta

Sífellt fleiri þingmenn Demókrataflokksins kalla hærra eftir því að fulltrúadeild Bandaríkjaþings hefji rannsókn sem gæti endað með því að Donald Trump, forseti, verði ákærður fyrir embættisbrot. Þar hefur ekki dregið úr eftir að Trump meinaði Don McGahn, fyrrverandi lögfræðingi Hvíta hússins að svara spurningum þingsins. Þá er hópur þingmanna Repúblikanaflokksins sem óttast að Trump sé að setja slæmt fordæmi með baráttu sinni gegn þinginu.

McGah var eitt af helstu vitnum Robert Mueller, sérstaks rannsakanda Dómsmálaráðuneytisins, í rannsókn hans á afskiptum Rússa af forsetakosningunum 2016, hvort framboð Trump hafi veitt þeim samstarf og hvort Trump hafi reynt að hindra framgang réttvísinnar.

Sjá einnig: Meina fyrrverandi lögfræðingi Hvíta hússins að starfa með þingmönnum

Með tilliti til þess að Hvíta húsið vinnur nú hörðum höndum að því að þingmenn geti ekki rætt við neina sem að ríkisstjórn Trump hafi komið, komi höndum ekki yfir nein gögn og halda því í rauninni fram að þingið eigi ekki rétt á því að rannsaka forsetann, segja einhverjir þingmenn Demókrataflokksins að þeir eigi engra kosta völ en að hefja áðurnefnt ferli, sem á ensku kallast impeachment.

Meðal ástæðna fyrir því að Demókratar vilja hefja rannsókn þeirra á því hvort að Trump hafi framið embættisbrot er að það myndi veita þeim sterkari stöðu í þeim dómsmálum sem standa nú yfir á milli Hvíta hússins og þingsins vegna núverandi rannsókna þeirra.

Sjá einnig: Æ fleiri Demókratar hoppa á ákæruvagninn

Leiðtogar flokksins eru þó ekki á þeim nótum að hefja rannsókn og vilja frekar einbeita sér að málefnum eins og heilsugæslu og öðrum málum sem komu flokknum mjög vel í þingkosningum í fyrra. Þar að auki standi nú nokkrar rannsóknir yfir hjá nefndum þingsins. Þrýstingurinn á þá leiðtoga hefur þó verið að aukast jafnt og þétt.

Óttast fordæmið sem Trump er að setja

Nokkrir þingmenn Repúblikanaflokksins, og þá aðallega menn sem hafa setið lengi á þingi, hafa áhyggjur af vörnum Trump gegn rannsóknum Demókrata. Sérstaklega þá vörn að þingið hafi í rauninni ekki vald til að rannsaka forseta Bandaríkjanna og ekki hvort hann hafi brotið lög.

Þó þeir séu andsnúnir rannsóknum Demókrata og þá sérstaklega þeim sem snúast að hans eigin fjármálum og fyrirtæki, óttast þeir fordæmið sem Trump er að setja. Því einhvern tímann mun Demókrati sitja í Hvíta húsinu og Repúblikanar vera með meirihluta á þingi.

Samkvæmt Politicio hafa þeir þingmenn sem hafa lýst yfir áhyggjum þó engar áætlanir um að bregðast við þeim áhyggjum. Þeir segja Demókrata vera að ofnota eftirlitsvald þingsins.

Einungis einn þingmaður Repúblikanaflokksins, Justin Amash, hefur lýst því yfir að þingið hefji rannsókn og segist hann hafa gert það eftir að hann las skýrslu Robert Mueller um Rússarannsóknina svokölluðu gaumgæfilega. Amash hefur einnig gagnrýnt aðra þingmenn og sagt þá greinilega ekki hafa lesið skýrsluna.

Sjá einnig: Repúblikani segir rétt að ákæra Trump fyrir embættisbrot

Um helgina sagði hann einnig að fjölmargir þingmenn sneru skoðunum sínum um ákæru vegna embættisbrots í 180 gráður eftir því hvort verið væri að tala um Bill Clinton eða Donald Trump.

Amash hefur verið harðlega gagnrýndu að félögum sínum í Repúblikanaflokknum í kjölfar yfirlýsingar hans.
 


Tengdar fréttir

Æ fleiri demókratar hoppa á ákæruvagninn

Hópur fulltrúadeildarþingmanna demókrata hefur kallað eftir því að ferlið til að ákæra Donald Trump forseta fyrir embættisbrot verði hafið. Leiðtogar demókrata hafa hingað til staðist þrýsting samflokksmanna sinna og lagt áherslu á ljúka skuli þeim fjölmörgu rannsóknum sem þingnefndir fulltrúadeildarinnar vinna nú að.

Repúblikani segir rétt að ákæra Trump fyrir embættisbrot

Justin Amash, þingmaður Repúblikanaflokksins í Michigan og einn íhaldssamasti þingmaður Bandaríkjanna, varð í gærkvöldi fyrsti þingmaður flokks síns til að halda því fram að Donald Trump, forseti, hefði hagað sér á þann veg að hægt væri að ákæra hann fyrir embættisrétt.

Skoða aðgerðir gegn fleirum í ríkisstjórn Trump

Nancy Pelosi, forseti fulltrúadeildar Bandaríkjaþings, gaf í skyn í dag að Demókratar í fulltrúadeildinni gætu sakað fleiri núverandi og fyrrverandi starfsmenn Donald Trump, forseta, um vanvirðingu gagnvart þinginu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.