Willum í byrjunarliði BATE í fyrsta sinn

Willum Þór Willumsson var í fyrsta skipti í byrjunarliði BATE Borisov þegar liðið vann 1-2 útisigur á Slavia Mozyr í hvít-rússnesku úrvalsdeildinni í fótbolta í dag.

Fyrir leikinn í dag hafði Willum tvisvar komið inn á sem varamaður í deildarleikjum hvít-rússnesku meistaranna.

Blikinn fékk tækifæri í byrjunarliðinu í dag og lék fyrstu 78 mínúturnar.

BATE var undir í hálfleik, 0-1, en tvö mörk snemma í seinni hálfleik tryggðu liðinu stigin þrjú.

BATE er í 3. sæti deildarinnar með níu stig. Liðið hefur unnið þrjá af fjórum leikjum sínum á tímabilinu og tapað einum.