Kevin Durant skoraði 38 stig þegar Golden State Warriors tók forystuna í einvíginu gegn Los Angeles Clippers, 2-1, með sigri í þriðja leik liðanna, 105-132, í 8-liða úrslitum Vesturdeildar NBA í nótt.

Clippers vann óvæntan sigur í öðrum leik liðanna en í leiknum í nótt réði Golden State ferðinni frá upphafi til enda. 

Durant fór á kostum og Stephen Curry skoraði 21 stig. Allir leikmenn Golden State nema einn komust á blað í leiknum í nótt. Ivica Zubac var atkvæðamestur hjá Clippers með 18 stig og 15 fráköst.


San Antonio Spurs komst aftur yfir í einvíginu gegn Denver Nuggets með sigri í þriðja leik liðanna í nótt, 118-108.

Derrick White var með 36 stig í liði San Antonio en hann hefur aldrei skorað jafn mikið í leik á ferlinum. DeMar DeRozan skoraði 25 stig í liði San Antonio. Nikola Jokic skoraði 22 stig fyrir Denver.

Í Austurdeildinni vann Philadelphia 76ers Brooklyn Nets, 115-131. Philadelphia er 2-1 yfir í einvíginu.

Tobias Harris skoraði 29 stig og tók 16 fráköst í liði Philadelphia. Hann hitti úr öllum sex þriggja stiga skotum sínum. Ben Simmons var stigahæstur hjá Philadelphia með 31 stig. D'Angelo Russell skoraði 26 stig fyrir Brooklyn.