Andri Rúnar skoraði í fyrsta úrvalsdeildarleiknum

Andri Rúnar Bjarnason skoraði þriðja og síðasta mark Helsingborg í 3-1 sigri á Norrköping í 1. umferð sænsku úrvalsdeildarinnar í dag.

Þetta var fyrsti leikur Andra Rúnars með Helsingborg í efstu deild en liðið vann B-deildina á síðasta tímabili. Bolvíkingurinn var markakóngur B-deildarinnar í fyrra og byrjar þetta tímabil af sama krafti og hann endaði það síðasta.

Staðan í hálfleik var 2-1, Helsingborg í vil. Rasmus Jönsson skoraði bæði mörk heimamanna en Jordan Larsson mark gestanna.

Þegar tíu mínútur voru til leiksloka gulltryggði Andri Rúnar svo sigur nýliðanna með sínu fyrsta marki í sænsku úrvalsdeildinni.

Guðmundur Þórarinsson var í byrjunarliði Norrköping og lék allan leikinn. Alfons Sampsted var ekki í leikmannahópi Norrköping í dag.