Lazio þjarmar að Milan

Lazio vann mikilvægan sigur á Inter, 0-1, í baráttunni um Meistaradeildarsæti í ítölsku úrvalsdeildinni í kvöld. Lazio hefur fengið tíu stig af tólf mögulegum í síðustu fjórum deildarleikjum sínum.

Serbneski miðjumaðurinn Sergej Milinkovic-Savic skoraði eina mark leiksins á 13. mínútu. Hann skallaði boltann í netið af stuttu færi eftir fyrirgjöf Luis Alberto.

Inter var meira með boltann í leiknum og átti fleiri tilraunir en það dugði skammt.

Lazio er í 5. sæti deildarinnar með 48 stig, þremur stigum á eftir AC Milan sem er í 4. sætinu. Lazio á leik til góða.

Inter er í 3. sætinu með 53 stig.