Innbrotsþjófur gripinn glóðvolgur við vafasama iðju sína

Innbrotsþjófur nokkur var í gær gripinn glóðvolgur þar sem hann var að bera þýfi sitt út í bíl sinn. Þetta var í Grafarholtinu og það sem varð til þess að þjófurinn var gómaður var öryggismyndavél. Hægt var að gera lögreglu viðvart og hún kom innan mínútna og náði kaupa þar sem hann var í óða önn við að koma sínu illa fengna góssi úr íbúðinni.

Ásgeir Pétur Guðmundsson lögreglufulltrúi segir að það hafi borið vel í veiði en híbýlin eru ekki langt frá Vínlandsleið, lögreglustöð 4.

„Já, hann hefur komið við sögu hjá okkur áður,“ segir Ásgeir Pétur spurður hvort um síbrotamann væri að ræða. Nokkra furðu vekur bíræfni gripdeildarmannsins en hann athafnaði sig eins og ekkert væri eðlilegra um hábjartan dag, klukkan 13:30. Ásgeir Pétur segir hann ekki þann eina sem hagar sér þannig.

„Það er að verða algengt í seinni tíð að svo er. Þetta getur gerst allt eins að degi til og að nóttu til.“

Innbrot hafa ekki verið að færast í aukana uppá síðkastið, sem betur fer segir Ásgeir Pétur. Heldur sé að þau séu á niðurleið.

„Þetta kemur stundum í hrinum. Það geta verið ýmsar skýringar á því. Kannski eru einhverjir ekki í umferð sem eru duglegir við þetta? Svo eru menn að koma til landsins í þessum tilgangi, gagngert til að stunda þetta. Það hefur komið upp en virðist ekki vera núna. Já, þetta er íslenskur ríkisborgari,“ segir lögreglufulltrúinn.