Elmar á skotskónum í jafntefli

Theodór Elmar Bjarnason var nálægt því að reynast hetja síns liðs þegar hann og félagar hans í Gazisehir Gaziantep gerðu jafntefli á útivelli við Istanbulspor í tyrknesku B-deildinni í fótbolta í dag.

Það blés ekki byrlega fyrir Elmari og félögum því Clesio kom heimamönnum yfir snemma leiks. Austurríkismaðurinn Seifedin Chabbi var hins vegar fljótur að svara fyrir Gazisehir og var staðan í leikhléi jöfn, 1-1.

Elmar kom gestunum svo yfir snemma í síðari hálfleik og höfðu þeir forystu allt þar til í uppbótartíma þegar Halil Ibrahim Sonmez jafnaði metin fyrir heimamenn. Lokatölur 2-2.

Elmar og félagar sitja í 3.sæti deildarinnar með níu stigum minna en Genclerbirligi sem er í 2.sæti en tvö efstu liðin fara beint upp á meðan sæti 3-6 fara í umspil.