Það vantar marga lykilmenn í sextán manna æfingahóp íslenska körfuboltalandsliðsins en framundan eru Smáþjóðaleikar í Svartfjallalandi dagana 27. maí - 1. júní.
Craig Pedersen, Finnur Freyr Stefánsson og Baldur Þór Ragnarsson, þjálfarar landsliðs karla, hafa kallað saman 16 leikmenn til æfinga en liðið hóf æfingar á mánudaginn í Ásgarði í Garðabæ og æfir næstu tvær vikurnar.
Margir af bestu körfuboltaleikmönnum landsins eru uppteknir með liðum sínum og þá eru nokkrir leikmenn frá vegna meiðsla eða af öðrum ástæðum.
Smáþjóðaleikarnir eru ekki innan keppnisdagatals FIBA sem orsakar skörun við félagslið í dagatali hjá þeim sem leika sem erlendis.
Lykilmennirnir sem eru uppteknir erlendis eru Martin Hermannsson, Haukur Helgi Pálsson, Tryggvi Snær Hlinason, Jón Axel Guðmundsson og Ægir Þór Steinarsson. Jón Axel er að undirbúa sig fyrir nýliðaval NBA-deildarinnar.
Íslenska liðið verður þannig án besta leikmanns Domino´s deildarinnar, Kristófers Acox, eins besta varnarmanns landsins, Harðar Axels Vilhjálmssonar og spútnikstjörnu úrslitakeppninnar, Matthíasar Orra Sigurðarsonar. Þeir eru allir komnir í frí frá verkefnum með liðum sínum en geta ekki verið með að þessu sinni.
Fyrir vikið er mikið af ungum og spennandi framtíðarleikmönnum í íslenska hópnum og Smáþjóðaleikarnir því kjörið tækifæri fyrir þá til að sýna sig og sanna fyrir landsliðsþjálfurunum.
Æfingahópurinn er skipaður eftirtöldum leikmönnum:
Björgvin Hafþór Ríkharðsson · Skallagrímur
Breki Gylfason · Appalachian State, USA
Dagur Kár Jónsson · Raiffeisen Flyers Wels, Austurríki
Elvar Már Friðriksson · Njarðvík
Gunnar Ólafsson · Keflavík
Halldór Garðar Hermannsson · Þór Þorlákshöfn
Haukur Óskarsson · Haukar
Hilmar Smári Henningsson · Haukar
Hjálmar Stefánsson · Haukar
Ingvi Þór Guðmundsson · Grindavík
Kristinn Pálsson · Njarðvík
Ólafur Ólafsson · Grindavík
Ragnar Ágúst Nathanaelsson · Valur
Sigurður Gunnar Þorsteinsson · ÍR
Sigvaldi Eggertsson · Monbus Obradorio
Þórir Guðmundur Þorbjarnarson · Nebraska, USA
Leikmenn sem voru valdir en eru ennþá í verkefnum með sínum liðum og því uppteknir:
Frank Booker Jr. · ALM Évreux, Frakkland
Haukur Helgi Pálsson · Nanterre 92, Frakkland
Jón Axel Guðmundsson · NBA-liða æfingar, USA
Martin Hermannsson · Alba Berlin, Þýskaland
Tryggvi Snær Hlinason · Obradorio, Spánn
Ægir Þór Steinarsson · Regatta Corrientes, Argentína
Leikmenn sem voru valdir en eru meiddir/gefa ekki kost á sér:
Collin Pryor · Stjarnan
Hörður Axel Vilhjálmsson · Keflavík
Kári Jónsson · Barcelona
Kristófer Acox · KR
Matthías Orri Sigurðarson · ÍR
Sigtryggur Arnar Björnsson · Grindavík
Sveinbjörn Jóhannesson · Breiðablik
Ísland með hálfgert varalið á Smáþjóðaleikana í karlakörfunni
