„Ekki kynjamismunun að minnka mörkin“

Það er ekki kynjamismunun að minnka fótboltavelli og mörk í kvennafótbolta heldur er staðreyndin sú að í kvennaboltanum eru fleiri mörk eftir langskot vegna þess að markmennirnir eru minni. Þetta segir þjálfari kvennaliðs Chelsea.

Emma Hayes, þjálfari kvennaliðs Chelsea, skrifar pistil í breska blaðinu The Times þar sem hún talar um málið.

Hayes byrjar pistilinn á að benda á að konur stökkva yfir lægri grindur en karlar í grindahlaupi, enda eru konur að meðaltali lágvaxnari en karlar. Í körfubolta nota konur minni bolta enda konur almennt með minni hendur en karlar.

„Þessar staðreyndir þýða ekki að íþróttir verði að gera breytingar vegna líkamlegs mismunar á körlum og konum, né heldur að þær ættu að gera það. En þær veita grunn inn í umræðuna um vallarstærð og stærð markanna í fótbolta, og mér finnst sú umræða þörf,“ skrifar Hayes.

„Þegar ég fór fyrst að tala um þetta sakaði fólk mig um að vera á móti jafnrétti og sagði að ég væri að taka íþróttina aftur á bak.“

Hayes bendir á þá staðreynd að meðalhæð markmanna í ensku úrvalsdeildinni sé um 1,90m. Meðalhæð markmanna í efstu deild kvenna á Englandi er um 1,73m. Fótboltamark er 2,44m á hæð og 7,3m á breidd.

Áhrif hæðarmismunarins má sjá í tölfræðinni þar sem í úrvalsdeild kvenna eru fleiri langskot og af lengra færi en í karladeildinni þrátt fyrir að skot í kvennaboltanum séu almennt kraftminni en í karlaboltanum.

Markvarsla í kvennaboltanum fær oft nokkra gagnrýni en Hayes hendir því fram að það sé ekki málið að markverðirnir séu lélegri heldur einfaldlega það að þær eru minni.

„Carly Telford, sem spilar fyrir mig hjá Chelsea, talaði um að við þyrftum að bæta markmannsþjálfun. Við getum alltaf gert betur í að vinna í skerpu og staðsetningu, en þetta vandamál verður líklega alltaf til staðar nema við byrjum að leita að óvenjulega háum konum,“ skrifar Hayes.

Allan pistil hennar má lesa hér.