Viðskipti erlent

Nýjustu olíulindir taldar tryggja auðlegð Noregs næstu áratugi

Kristján Már Unnarsson skrifar
Frá Johan Sverdrup-svæðinu í Norðursjó, nýjasta olíuvinnslusvæði Noregs. Það ber nafn Johans Sverdrups, fyrsta forsætisráðherra þingbundinnar ríkisstjórnar í Noregi, sem var við völd á árunum 1884 til 1889.
Frá Johan Sverdrup-svæðinu í Norðursjó, nýjasta olíuvinnslusvæði Noregs. Það ber nafn Johans Sverdrups, fyrsta forsætisráðherra þingbundinnar ríkisstjórnar í Noregi, sem var við völd á árunum 1884 til 1889. Mynd/Equinor, Espen Rønnevik og Øyvind Gravås.
Norðmenn hófu um helgina að dæla olíu upp af Johan Sverdrup-svæðinu, en þar eru einhverjar verðmætustu olíulindir sem fundist hafa í lögsögu Noregs. Svæðið er talið geta haldið lífi í olíuævintýri Norðmanna næstu hálfa öld en náttúruverndarsamtök segja það á sama hátt framlengja losun gróðurhúsalofttegunda. Þetta kom fram í fréttum Stöðvar 2. 

Johan Sverdrup svæðið er í Norðursjó, um 140 kílómetra vestur af Stafangri, og olían þar fannst ekki fyrr en árið 2010. Norska ríkisolíufélagið Equinor, áður Statoil, sem er aðaleigandi, segir ekki þurfa nema 20 dollara olíuverð á tunnu til að vinnslan borgi sig og áætlar að svæðið skili að jafnaði 660 þúsund olíutunnum á degi hverjum næstu fimmtíu ár.

Áætlað framleiðsluverðmæti í heild samsvarar 19 þúsund milljörðum íslenskra króna en þar af er áætlað að 12 þúsund milljarðar renni í sjóði norska ríkisins, eða sem svarar 2,3 milljónum króna á hvern íbúa Noregs.

Smíði hinna gríðarstóru vinnslupalla hófst árið 2015 en aðeins fyrri áfangi er kominn upp. Undir þyrlupallinum vinstra megin má sjá níu appelsínugula björgunarbáta.Mynd/Equinor, Espen Rønnevik og Øyvind Gravås.
Efnahagsleg áhrif eru þegar orðin gríðarleg en fara þarf þrjátíu ár aftur í tímann til að finna dæmi um viðlíka framkvæmdir í norska olíuiðnaðinum. Smíði hinna gríðarstóru vinnslupalla svæðisins hófst árið 2015 og er talin skapa 15 þúsund störf í Noregi á tíu ára byggingartíma. Olíuvinnslan er síðan talin skapa 3.400 störf að jafnaði næstu hálfa öld. Þegar uppbyggingu svæðisins lýkur árið 2025, og framleiðslan verður komin á fullt, er áætlað að það muni standa undir þriðjungi allrar olíuframleiðslu Norðmanna. 

Equinor hrósar sér jafnframt af því að með raforku um sæstreng úr landi verði þetta umhverfisvænasta olíuvinnslusvæði heims, og þannig verði losun gróðurhúsalofttegunda 25-falt minni á hverja framleidda olíutunnu en að jafnaði annarsstaðar. Náttúruverndarsamtök segja á móti að þegar olían frá svæðinu verði notuð losi hún alls 1,3 milljarða tonna af koltvísýringi, 25-falt meira en allur Noregur losi núna á heilu ári.

Margar vinnsluholur á hafsbotni eru tengdar vinnslupöllunum.Teikning/Equinor.
Johan Sverdrup er talið þriðja olíuríkasta vinnslusvæði Noregs. Sjávardýpi þar er um 120 metrar en olíulindirnar eru á um 1.900 metra dýpi undir hafsbotni. Olíunni verður dælt um neðansjávarlögn í Mongstad-olíuvinnslustöðina norðan við Björgvin. Gasi verður dælt um aðra neðansjávarlögn í Kårstø-gasvinnslustöðina suðaustan við Haugasund.

Hér má sjá frétt Stöðvar 2 með loftmyndum af vinnslupöllunum:


Tengdar fréttir

Allt fellur með Norðmönnum - finna enn meira af olíu

Norska olíufyrirtækið Statoil, þar sem norska ríkið á tæplega 70 prósent eignarhlut, staðfesti í morgun að félagið hefði fundið vinnanlega olíu á svokölluðu Geitungen-svæði, sem er nærri Johan Sverdrup-svæðinu í Norðursjó.






Fleiri fréttir

Sjá meira


×