Aprílspá Siggu Kling – Meyjan: Ekki leika þér að eldinum

Elsku Meyjan mín, þú blaktir eins og lauf í vindi og þér finnst hafa verið dálítið óveður undanfarið, þú ert búin að vera að reyna þitt besta að reyna að leysa lífsins þrautir og fá góða útkomu úr öllu. En stundum ráðum við ekki við allt og lífið er búið að færa þér vissar skorður og þú þarft að taka ákvörðun: já eða nei?

Það er svo tilfinningaþrungið lífið þitt og stressið getur lamað þig, ekki leika þér að eldinum eða að einhverju sem mun ekki skipta þig neinu máli sem gæfi þér einungis stundarkikk og það skilar þér ekki neinu. Vertu frekar örlátur á það sem virkilega skiptir máli og sýndu ástríki þitt með einlægni, það kemur þér lengst.

Þú veist alveg hver tilgangur lífsins er því þinn karakter er svo djúpur, þú færð sterk hugboð, negldu þau strax niður. Til þess að þér gangi sem best skaltu fara eftir þessu merkilega innsæi sem þú hefur, helst innan nokkurra mínútna eftir að þú hefur fengið skilaboð, þá muntu fljúga eins og fegursti fugl að ekkert myndi stoppa þig þó að á móti blási.

Þú átt eftir að afreka svo margt næstu mánuði og munt sérstaklega sjá útkomuna þegar líða tekur á árið. Farðu aftur í huganum á líflínuna þína og skoðaðu á hvaða tímabili þér leið best, kallaðu það svo aftur inn í líf þitt því að þú ert að fara inn í þann tíma sem þú ert alveg beintengd við hið andlega, svo skrifaðu lífið í þeim anda sem þú vilt hafa það og segðu oftar já og gerðu eitthvað nýtt, núna er tíminn!

Knús og kossar, þín Sigga Kling

Frægar Meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður, Selma Ragnars, fatahönnuður Íslands, Lalli Johns góðkunningi lögreglunnar, Sema Erla Serdar, baráttukona, Eydís Ósk hjúkrunarkona, Raggi Bjarna.